ۇكىمەت شىعىس قازاقستاندا وبلىسىنداعى وزەندەردىڭ الەۋەتىن پايدالانىپ، شاعىن سۋ ەلەكتر ستانسيالارىنىڭ سانىن ارتتىرۋ جوسپارلاپ وتىر. بۇل ەڭ الدىمەن، تۇرعىندار ءۇشىن ەلەكتر ەنەرگياسىن تۇتىنۋ قۇنىن تومەندەتۋگە مۇمكىندىك بەرەدى.

ۇكىمەت باسشىسى اسقار مامين وڭىرگە جاساعان جۇمىس ساپارى بارىسىندا التاي اۋدانىنداعى تۇرعىسىن وزەنىندە سالىنىپ جاتقان سەس-تە كورىپ، قۇرىلىس جۇمىستارىنىڭ بارىسىمەن تانىستى. بۇگىندە قۇرىلىس جۇمىستارى اياقتالۋعا تاياۋ. ۇستىمىزدەگى جىلدىڭ قىركۇيەك ايىندا ىسكە قوسىلاتىن ستانسيانىڭ قۋاتتىلىعى 29،4 مۆت قۇرايدى.

مامانداردىڭ پىكىرىنشە، تۇرعىسىن وزەنىندە وسى ىسپەتتەس تاعى ءۇش ستانسيا سالۋ جوسپارلانعان. سەس-تىڭ سۋ جيناتىن بوگەتىنىڭ ۇزىندىعى 284 مەتردى قۇرايدى. مۇندا قۋات كوزىن ءوندىرۋ ءۇشىن 6 ميلليون تەكشە مەتر سۋ قورىن جيناقتاۋعا بولادى. وسى رەتتە جاڭا نىسان شىعىستىڭ 40 گرادۋستىق سارى ايازى مەن كوكتەمگى سۋ تاسقىنىنا توتەپ بەرەتىنىمەن ەرەكشەلەنەدى.

پرەمەر-مينيستر ەۋروپا مەن امەريكاداعى وزىق تەحنولوگيانىڭ نەگىزىندە سالىنىپ جاتقان نىسانعا گيدروەنەرگەتيكالىق قوندىرعىلاردىڭ قالاي ورناتىلىپ جاتقانىن ءوز كوزىمەن كوردى.

جالپى، ستانسيادا قۋات كوزىن وندىرەتىن ءۇش قوندىرعى بولادى ونىڭ ەكەۋى 11،5 مۆت بولسا، ءۇشىنشىسى 1 مۆت قۇرايدى. زامناۋي قوندىرعىلار قاتتى ايازدا، تاۋ وزەندەر مۇز قۇرساعاندا دا جۇمىس ىستەي بەرەدى. ايتا كەتۋىمىز كەرەك، سۋ ەلەكتر ستانسيالارى ىسكە قوسىلعاننان كەيىن ول بىردەن قازاقستاننىڭ ءبىرتۇتاس ەنەرگەتيكالىق جۇيەسىنە قوسىلىپ، قاشىقتان باسقارۋ جۇيەسىندە جۇمىس ىستەيدى.

اسقار مامين وبلىستا شاعىن وزەندەردىڭ پوتەنسيالىن ءتيىمدى پايدالانىپ، ەلەكتر ەنەرگياسىن ءوندىرۋ سالاسىنا وڭ باعاسىن بەردى.