Shyǵys Qazaqstanda turǵyndardy qoldaýǵa jáne óńirdiń demografiialyq áleýetin nyǵaitýǵa baǵyttalǵan jańa bastamalar júzege asyrylyp jatyr. Solardyń biri – «Shyǵys shaqyrady» óńirlik jobasy. Baǵdarlama elimizdiń birqatar óńirlerinen qonys aýdarýǵa nietti azamattarǵa jańa múmkindik usynyp, eńbek etýge, bilim alýǵa jáne baspanaly bolýǵa jol ashady, dep habarlaidy Dalanews.kz.
Búginde kóshi-qon saldosy óńir úshin ózekti máselelerdiń biri bolyp otyr. Ótken jyldyń qorytyndysy boiynsha oblystan tórt myń adam kóship ketken. Osyǵan bailanysty aimaqqa jańa turǵyndardy tartý jumystary kúsheitildi. Baǵdarlama aiasynda Almaty, Túrkistan, Mańǵystaý, Jambyl, Qyzylorda oblystarynan, Jetisý óńirinen, sondai-aq Astana, Almaty jáne Shymkent qalalarynan qonys aýdarýshylardy qabyldaý josparlanǵan.
Byltyr óńirge barlyǵy 800-ge jýyq adam qonys aýdardy. Onyń ishinde eki júzden asa – qandas, al 600-ge jýyǵy eldiń basqa óńirlerinen kóship kelgender. Kelgenderdiń arasynda joǵary bilimi bar 82 adam, orta arnaýly bilimi bar 110 adam bar. Úsh júzden asa eńbekke qabiletti azamattyń 195-i jumyspen qamtyldy.
Qonys aýdarýshylarǵa memleket tarapynan aýqymdy qoldaý kórsetilip keledi. Ótken jyly bul maqsatqa 496 mln teńge bólindi. Atap aitqanda, 181 otbasyǵa kóshýge arnalǵan sýbsidiia berilip, oǵan 173 mln teńge jumsaldy. 60 otbasyǵa turǵyn úidi jalǵa alý shyǵyndaryn óteý úshin 18 mln teńge bólindi. Al 72 otbasyǵa baspana satyp alý úshin ekonomikalyq mobildik sertifikattary berilip, jalpy somasy 276 mln teńgeni qurady.
«Shyǵys shaqyrady» jobasy qonys aýdarýshylardy yntalandyrýdyń jańa tetikterin de qamtidy. Baǵdarlama tórt negizgi baǵyt boiynsha iske asyrylady. Birinshisi – biznes bastamalardy júzege asyrýǵa 2,9 mln teńgege deiin qaitarymsyz memlekettik granttar berý. Ekinshisi – aýyldyq eldi mekenderdiń mektep túlekterine kolledjder men joǵary oqý oryndarynda bilim alý úshin bilim granttaryn usyný. Úshinshisi – «Otbasy banki» arqyly jyldyq mólsherlemesi 5 paiyz bolatyn, 20 mln teńgege deiin jeńildetilgen turǵyn úi nesiesin berý. Tórtinshi baǵyt – jergilikti kásipkerlerdiń áleýmettik jaýapkershiligi aiasynda bos turǵan úilerdi jóndep, qonys aýdarýshylarǵa qonystanýǵa daiyndaý.
Joba aiasynda turǵyndardy aqparattandyrý jumystary da belsendi júrgizilip keledi. Óńirde ómir súrý men eńbek etý múmkindikteri týraly túsindirý sharalary turaqty túrde uiymdastyrylyp turady.
2026 jyly oblysqa 600 adamdy kóshirý josparlanyp otyr. Onyń ishinde 200 qandas pen 400 qonys aýdarýshy bar. Baǵdarlamanyń mańyzdy baǵyttarynyń biri – protsesterdi tsifrlandyrý. Qonys aýdarýshylardy súiemeldeý jumystary FSMSocial mobildi qosymshasy arqyly júrgiziledi. Bul júiede kelgen azamattardyń derekteri engizilip, kórsetilgen qyzmetter boiynsha foto jáne beineesepter tirkeledi. Árbir otbasynyń qajettiligi jeke anyqtalyp, jumysqa ornalasý, áleýmettik tólemder alý, turǵyn úi máselesin sheshý sekildi baǵyttarda jan-jaqty qoldaý kórsetiledi.
Osylaisha «Shyǵys shaqyrady» jobasy jańa ómir bastaýǵa nietti azamattar úshin tek kóshý baǵdarlamasy ǵana emes, turaqty jumysqa, bilimge jáne óz isin damytýǵa jol ashatyn naqty múmkindikke ainalyp otyr.
