شىعىس قازاقستاندا تۇرعىنداردى قولداۋعا جانە ءوڭىردىڭ دەموگرافيالىق الەۋەتىن نىعايتۋعا باعىتتالعان جاڭا باستامالار جۇزەگە اسىرىلىپ جاتىر. سولاردىڭ ءبىرى – «شىعىس شاقىرادى» وڭىرلىك جوباسى. باعدارلاما ەلىمىزدىڭ ءبىرقاتار وڭىرلەرىنەن قونىس اۋدارۋعا نيەتتى ازاماتتارعا جاڭا مۇمكىندىك ۇسىنىپ، ەڭبەك ەتۋگە، ءبىلىم الۋعا جانە باسپانالى بولۋعا جول اشادى، دەپ حابارلايدى Dalanews.kz.
بۇگىندە كوشى-قون سالدوسى ءوڭىر ءۇشىن وزەكتى ماسەلەلەردىڭ ءبىرى بولىپ وتىر. وتكەن جىلدىڭ قورىتىندىسى بويىنشا وبلىستان ءتورت مىڭ ادام كوشىپ كەتكەن. وسىعان بايلانىستى ايماققا جاڭا تۇرعىنداردى تارتۋ جۇمىستارى كۇشەيتىلدى. باعدارلاما اياسىندا الماتى، تۇركىستان، ماڭعىستاۋ، جامبىل، قىزىلوردا وبلىستارىنان، جەتىسۋ وڭىرىنەن، سونداي-اق استانا، الماتى جانە شىمكەنت قالالارىنان قونىس اۋدارۋشىلاردى قابىلداۋ جوسپارلانعان.
بىلتىر وڭىرگە بارلىعى 800-گە جۋىق ادام قونىس اۋداردى. ونىڭ ىشىندە ەكى جۇزدەن اسا – قانداس، ال 600-گە جۋىعى ەلدىڭ باسقا وڭىرلەرىنەن كوشىپ كەلگەندەر. كەلگەندەردىڭ اراسىندا جوعارى ءبىلىمى بار 82 ادام، ورتا ارناۋلى ءبىلىمى بار 110 ادام بار. ءۇش جۇزدەن اسا ەڭبەككە قابىلەتتى ازاماتتىڭ 195ء-ى جۇمىسپەن قامتىلدى.
قونىس اۋدارۋشىلارعا مەملەكەت تاراپىنان اۋقىمدى قولداۋ كورسەتىلىپ كەلەدى. وتكەن جىلى بۇل ماقساتقا 496 ملن تەڭگە ءبولىندى. اتاپ ايتقاندا، 181 وتباسىعا كوشۋگە ارنالعان سۋبسيديا بەرىلىپ، وعان 173 ملن تەڭگە جۇمسالدى. 60 وتباسىعا تۇرعىن ءۇيدى جالعا الۋ شىعىندارىن وتەۋ ءۇشىن 18 ملن تەڭگە ءبولىندى. ال 72 وتباسىعا باسپانا ساتىپ الۋ ءۇشىن ەكونوميكالىق موبيلدىك سەرتيفيكاتتارى بەرىلىپ، جالپى سوماسى 276 ملن تەڭگەنى قۇرادى.
«شىعىس شاقىرادى» جوباسى قونىس اۋدارۋشىلاردى ىنتالاندىرۋدىڭ جاڭا تەتىكتەرىن دە قامتيدى. باعدارلاما ءتورت نەگىزگى باعىت بويىنشا ىسكە اسىرىلادى. ءبىرىنشىسى – بيزنەس باستامالاردى جۇزەگە اسىرۋعا 2،9 ملن تەڭگەگە دەيىن قايتارىمسىز مەملەكەتتىك گرانتتار بەرۋ. ەكىنشىسى – اۋىلدىق ەلدى مەكەندەردىڭ مەكتەپ تۇلەكتەرىنە كوللەدجدەر مەن جوعارى وقۋ ورىندارىندا ءبىلىم الۋ ءۇشىن ءبىلىم گرانتتارىن ۇسىنۋ. ءۇشىنشىسى – «وتباسى بانكى» ارقىلى جىلدىق مولشەرلەمەسى 5 پايىز بولاتىن، 20 ملن تەڭگەگە دەيىن جەڭىلدەتىلگەن تۇرعىن ءۇي نەسيەسىن بەرۋ. ءتورتىنشى باعىت – جەرگىلىكتى كاسىپكەرلەردىڭ الەۋمەتتىك جاۋاپكەرشىلىگى اياسىندا بوس تۇرعان ۇيلەردى جوندەپ، قونىس اۋدارۋشىلارعا قونىستانۋعا دايىنداۋ.
جوبا اياسىندا تۇرعىنداردى اقپاراتتاندىرۋ جۇمىستارى دا بەلسەندى جۇرگىزىلىپ كەلەدى. وڭىردە ءومىر ءسۇرۋ مەن ەڭبەك ەتۋ مۇمكىندىكتەرى تۋرالى ءتۇسىندىرۋ شارالارى تۇراقتى تۇردە ۇيىمداستىرىلىپ تۇرادى.
2026 جىلى وبلىسقا 600 ادامدى كوشىرۋ جوسپارلانىپ وتىر. ونىڭ ىشىندە 200 قانداس پەن 400 قونىس اۋدارۋشى بار. باعدارلامانىڭ ماڭىزدى باعىتتارىنىڭ ءبىرى – پروسەستەردى سيفرلاندىرۋ. قونىس اۋدارۋشىلاردى سۇيەمەلدەۋ جۇمىستارى FSMSocial ءموبيلدى قوسىمشاسى ارقىلى جۇرگىزىلەدى. بۇل جۇيەدە كەلگەن ازاماتتاردىڭ دەرەكتەرى ەنگىزىلىپ، كورسەتىلگەن قىزمەتتەر بويىنشا فوتو جانە بەينەەسەپتەر تىركەلەدى. ءاربىر وتباسىنىڭ قاجەتتىلىگى جەكە انىقتالىپ، جۇمىسقا ورنالاسۋ، الەۋمەتتىك تولەمدەر الۋ، تۇرعىن ءۇي ماسەلەسىن شەشۋ سەكىلدى باعىتتاردا جان-جاقتى قولداۋ كورسەتىلەدى.
وسىلايشا «شىعىس شاقىرادى» جوباسى جاڭا ءومىر باستاۋعا نيەتتى ازاماتتار ءۇشىن تەك كوشۋ باعدارلاماسى عانا ەمەس، تۇراقتى جۇمىسقا، بىلىمگە جانە ءوز ءىسىن دامىتۋعا جول اشاتىن ناقتى مۇمكىندىككە اينالىپ وتىر.
