Kóp jyldyq tájirıbege súıene otyryp, Shyǵys Qazaqstanda uzyndyǵy 256 shaqyrym bolatyn 130 qar basyp qalatyn ýchaskeler kúsheıtilgen baqylaýǵa alynatyn bolady. Zardap shekkenderge kómek kórsetý úshin 10 jylytý pýnkti men 15 jol boıyndaǵy bıznes nysanynyń jumysy uıymdastyrylady. Ulan aýdany Prıvolnoe aýylynda táýlik boıy 1 trassalyq medısınalyq-qutqarý pýnkti jumys isteıdi, dep habarlaıdy Dalanews.kz SHQO TJD baspasóz qyzmetine silteme jasap.
"Jergilikti aýqymdaǵy TJ joıý josparyna sáıkes jeke quramnyń 1717 adamy, 686 birlik tehnıka jumyldyrylady. Onyń ishinde 389 qar tazalaý tehnıkasy, 181 ınjenerlik tehnıka, 30 evakýasıalyq tehnıka jáne 86 joǵary ótimdi tehnıka. Jyl saıynǵy tájirıbeni eskere otyryp, bul tehnıka "Óskemen – Altaı – Úlken Naryn – Katonqaraǵaı – Rahman qaınarlary", "Óskemen – Shemonaıha – RF shekarasy", "Óskemen – Semeı", oblystyq mańyzy bar joldarda: "Óskemen – Tarǵyn – Samar" joldarda jumys isteýge tartylady.
Oblys aýmaǵynda 497 kóshkin túsetin aımaqtar bar. SHQ "Qazseldenqorǵaý" MM fılıaly oblystyń qyzmet kórsetiletin aýdandary boıynsha qar kóshkini qaýpi bar kezeńge ýaqtyly daıyndyq maqsatynda qar kóshkini marshrýttaryn ázirledi. Qar kóshkini qaýpi bar kezeń ishinde baqylaýshylar apta saıyn qar kóshkini qaýpi bar ýchaskelerge jerústi zertteý júrgizedi jáne qajet bolǵan jaǵdaıda qar massasyn túsirýdi júzege asyrady.
"Sýyq aýa raıynyń bastalý kezeńinde azamattarmen olardyń júrip-turý jolynda bolatyn jazataıym oqıǵalar jıilep barady. Aýa-raıynyń nasharlaýyn boljaý kezinde biz "Dármen" mobıldi qosymshasynda SMS-taratý, tele-, radıoqabyldaý, BAQ, áleýmettik jeliler arqyly daýyldy eskertýlerdi halyqqa jetkizemiz. Daýyl týraly eskertýlerdi jarıalaý kezinde alys qashyqtyqqa barýdan bas tartýdy usynamyz. Júrgizýshiler joldardyń jaı-kúıi týraly aqparatty qadaǵalap otyrýy kerek", - dep túsindirdi SHQO TJD bastyǵynyń orynbasary Qýatbek Kenjebekuly.
SHQO TJD komısıa quramynda "QazAvtoJol" UK" AQ SHQOF, JAO, JPQ ókilderiniń qatysýymen "Qazaqavtojol" JSHS oblystyq fılıalynyń respýblıkalyq mańyzy bar avtojoldardy qys merzimine daıyndyǵyna tekserýler júrgiziledi, nátıjeleri boıynsha daıyndyq aktilerin jasalynatyn bolady.
"Qys-2024" respýblıkalyq komandalyq-shtabtyq oqý-jattyǵýlary sheńberinde oblystyq Azamattyq qorǵaý qyzmetterin qysqy kezeńnen ótýge tekserý josparlanǵan.
