Qytai Kommýnistik partiiasynyń eń joǵary marapaty – «1 shilde» medalin ielengen etnikalyq qazaq dáriger Uqash Súleimen týǵan jeri – Shyńjańnyń Sháýeshek aimaǵyna qarasty Shaǵantoǵai aýdanyna oraldy, dep habarlaidy dalanews.kz.
Áleýmettik jelilerde taraǵan videoda aýyl turǵyndarynyń tanymal dárigerdi erekshe qurmetpen qarsy alǵany kórinedi. Jarty ǵasyrǵa jýyq ýaqytyn halyq densaýlyǵyna arnaǵan aq halatty abyzdy jerlesteri zor qoshemetpen kútip aldy.
Videoda Uqash Súleimen balalarǵa júrekjardy tilegin de jetkizgen.
«Balaqailar, amansyńdar ma? Men Shaǵantoǵai aýdanynanmyn. Atym – Oqas. Ózderińe myń shaqyrym tyraq qursam da, meniń kóńilim sendermen birge. Men qyryq jyl ómir boiy at minip, saharada júrip halyqqa qyzmet ettim. Ózderińdei 3200 sábidiń aman-esen dúniege kelýine sebepshi boldym. Qandai qaqaǵan aiaz bolsa da, maǵan bóget bolmady. Óitkeni “adam bolý kerek” degen uǵymdy janyma berik saqtadym. Sender batyrlardyń urpaǵysyńdar. Keń saharada tai-qulyndai asyr salyp ósip, baqtaryń ashylsyn!» – deidi ol.
Eske salaiyq, jaqynda Qytai Halyq Respýblikasynyń Tóraǵasy Si Tszinpin Uqash Súleimenge Qytai Kommýnistik partiiasynyń eń joǵary marapaty – «1 shilde» medalin tabystady. Ol bul marapatqa ie bolǵan alǵashqy etnikalyq qazaq atandy.
Uqash Súleimen 1975 jyldan beri Shyńjańdaǵy shalǵai aýyldarda dáriger bolyp eńbek etip, atpen qatynap myńdaǵan shaqyrym jol júrip, 100 myńnan astam adamǵa meditsinalyq kómek kórsetken. Sondai-aq 3200-den astam sábidiń dúniege kelýine kómektesken. Osy eńbegi úshin jergilikti halyq ony «Aq halatty salt atty dáriger» dep ataidy.
