Qytai Halyq Respýblikasynyń Tóraǵasy Si Tszinpin etnikalyq qazaq dáriger Uqash Súleimendi (Uhas Sulayman) Qytai Kommýnistik partiiasynyń eń joǵary marapaty – «1 shilde» medalimen marapattady, dep habarlaidy dalanews.kz.
Marapattaý rásimi Qytai Kommýnistik partiiasynyń qurylǵanyna 105 jyl tolýyna orai Beijińdegi Halyq jinalysy saraiynda ótti. Biyl bul joǵary marapatqa eldiń damýyna jáne halyqqa qyzmet etýge erekshe úles qosqan segiz azamat ǵana ie boldy. Olardyń qatarynda etnikalyq qazaq dáriger Uqash Súleimen de bar.
Qytailyq aqparat quraldarynyń málimetinshe, Uqash Súleimen – «1 shilde» medalin alǵan alǵashqy etnikalyq qazaq.
Uqash Súleimen eńbek jolyn 1975 jyly meditsina kolledjin támamdaǵannan keiin bastaǵan. Ol ondaǵan jyl boiy Qytaidyń Shyńjań Uiǵyr avtonomiialyq aýdanyndaǵy Tarbaǵatai aimaǵynda dáriger bolyp qyzmet etti. Qalada jumys isteýge múmkindigi bolǵanyna qaramastan, shalǵaidaǵy malshy aýyldarǵa baryp, halyqqa meditsinalyq kómek kórsetýdi tańdaǵan.
Dáriger ondaǵan jyl boiy atpen júrip, taýly asýlardy, ózenderdi jáne qalyń qardy kesip ótip, shalǵaidaǵy aýyldarǵa barǵan. Bir joly qalyń boranda birneshe shaqyrym jaiaý júrip baryp, bosanǵaly jatqan áieldiń ómirin saqtap qalǵany aitylady.
Eńbek jolynda ol 200 myń shaqyrymnan astam jol júrip, 100 myńnan astam adamǵa meditsinalyq kómek kórsetken jáne 3200-den astam sábidiń dúniege kelýine qatysqan. Osy eńbegi úshin jergilikti halyq ony «Aq halatty salt atty batyr» dep ataǵan.
Uqash Súleimen 2015 jyly zeinetke shyqqanymen, dárigerlik qyzmetin toqtatpaǵan. Ol jeke klinika ashyp, jergilikti turǵyndardy tegin qabyldaýdy jalǵastyryp, shalǵai aýyldarǵa meditsinalyq kómek kórsetetin eriktiler bastamasyn uiymdastyrǵan.
«1 shilde» medali – Qytai Kommýnistik partiiasynyń eń joǵary nagradasy. Ol eldiń damýyna, qoǵam igiligine jáne halyqqa qyzmet etýge erekshe úles qosqan partiia múshelerine tabystalady.
