Қытай Халық Республикасының Төрағасы Си Цзиньпин этникалық қазақ дәрігер Ұқаш Сүлейменді (Uhas Sulayman) Қытай Коммунистік партиясының ең жоғары марапаты – «1 шілде» медалімен марапаттады, деп хабарлайды dalanews.kz.
Марапаттау рәсімі Қытай Коммунистік партиясының құрылғанына 105 жыл толуына орай Бейжіңдегі Халық жиналысы сарайында өтті. Биыл бұл жоғары марапатқа елдің дамуына және халыққа қызмет етуге ерекше үлес қосқан сегіз азамат ғана ие болды. Олардың қатарында этникалық қазақ дәрігер Ұқаш Сүлеймен де бар.
Қытайлық ақпарат құралдарының мәліметінше, Ұқаш Сүлеймен – «1 шілде» медалін алған алғашқы этникалық қазақ.
Ұқаш Сүлеймен еңбек жолын 1975 жылы медицина колледжін тәмамдағаннан кейін бастаған. Ол ондаған жыл бойы Қытайдың Шыңжаң Ұйғыр автономиялық ауданындағы Тарбағатай аймағында дәрігер болып қызмет етті. Қалада жұмыс істеуге мүмкіндігі болғанына қарамастан, шалғайдағы малшы ауылдарға барып, халыққа медициналық көмек көрсетуді таңдаған.
Дәрігер ондаған жыл бойы атпен жүріп, таулы асуларды, өзендерді және қалың қарды кесіп өтіп, шалғайдағы ауылдарға барған. Бір жолы қалың боранда бірнеше шақырым жаяу жүріп барып, босанғалы жатқан әйелдің өмірін сақтап қалғаны айтылады.
Еңбек жолында ол 200 мың шақырымнан астам жол жүріп, 100 мыңнан астам адамға медициналық көмек көрсеткен және 3200-ден астам сәбидің дүниеге келуіне қатысқан. Осы еңбегі үшін жергілікті халық оны «Ақ халатты салт атты батыр» деп атаған.
Ұқаш Сүлеймен 2015 жылы зейнетке шыққанымен, дәрігерлік қызметін тоқтатпаған. Ол жеке клиника ашып, жергілікті тұрғындарды тегін қабылдауды жалғастырып, шалғай ауылдарға медициналық көмек көрсететін еріктілер бастамасын ұйымдастырған.
«1 шілде» медалі – Қытай Коммунистік партиясының ең жоғары наградасы. Ол елдің дамуына, қоғам игілігіне және халыққа қызмет етуге ерекше үлес қосқан партия мүшелеріне табысталады.
