Qazaqstanda jol jóndeý jumystary qyzý júrip jatqanymen, keibir júrgizýshiler qaýipsizdik talaptaryn elemei, qarsy baǵyttaǵy jolaqqa shyǵyp, ózge jol qozǵalysyna qatysýshylardyń ómirine qaýip tóndirýde, dep habarlaidy dalanews.kz.
Áleýmettik jelilerde taraǵan videoda jol jóndeý júrip jatqan ýchaskede kólik keptelisi paida bolǵany kórinedi. Alaida kezegin kútkisi kelmegen birneshe júrgizýshi qarsy baǵyttaǵy jolaqqa shyǵyp, qozǵalysty qiyndatqan. Sonyń saldarynan joldyń eki baǵytynda da kólikterdiń júrýi qiyndap, keptelis odan ári ulǵaiǵan.
Mundai jaǵdailar jaz mezgilinde jii qaitalanady. Sebebi dál osy kezeńde elimizdiń kóptegen óńirinde respýblikalyq jáne oblystyq mańyzy bar avtojoldarda jóndeý jumystary júrgizilýde.
Jol qaýipsizdigi mamandarynyń aitýynsha, jóndeý jumystary kezinde ýaqytsha jol belgileri men retteýshilerdiń nusqaýyn saqtaý. Al qarsy jolaqqa shyǵý tek júrgizýshiniń ózine ǵana emes, qarsy baǵyttaǵy kólikterge de úlken qaýip tóndiredi.
Qazaqstan zańnamasyna sáikes, qarsy qozǵalys jolaǵyna zańsyz shyǵý júrgizýshi kýáliginen aiyrýǵa deiingi jaýapkershilikke ákelýi múmkin. Buǵan deiin de mundai quqyq buzýshylyqtar úshin júrgizýshiler jaýapqa tartylǵan.
Jeli qoldanýshylary mundai áreketterdiń saldarynan jol jóndeý jumystarynyń ózi uzaqqa sozylyp, keptelis odan saiyn ulǵaiatynyn aityp, júrgizýshilerdi jol mádenietin saqtaýǵa shaqyrýda.
