Atap aitsaq, taraptar oblysymyzdyń qalalary men aýdan ortalyqtaryndaǵy kóshe shamdaryn jańartý jónindegi kelisimshartqa qol qoidy. Atalmysh rásimge oblys ákimi Danial Ahmetov pen EQQDB-nyń Ortalyq Aziia elderindegi basqarýshy direktory Brýno Balvanera qatysty.
Shyǵys Qazaqstanǵa alǵash ret kelip turǵan mártebeli meimanǵa aimaqtyń áleýmettik-ekonomikalyq ahýaly týraly qysqasha maǵlumat bergen Danial Kenjetaiuly oblysymyz atalǵan qarjy uiymymen áriptestikti odan ári nyǵaitýǵa nietti ekenin málim etti.
– Sizderdiń bankterińizben birlesken jobalarymyz óte kóp. Bul sózime banktiń Qazaqstandaǵy jobalarynyń 29 paiyzy bizdiń oblysqa tiesili ekeni dálel bola alady. Endi osy áriptestigimizdi jańa deńgeige kótergimiz keledi. Esińizde bolsa, 90-shy jyldary Eýropalyq qaita qurý jáne damý bankiniń qarjylai qoldaýy elimizdiń iri qalalaryna qatysty jobalarmen ǵana shekteletin. Al qazirgi jaǵdai basqa, qarjy uiymy oblystardaǵy, aýdandardaǵy jobalarǵa da qyzyǵýshylyq tanyta bastady. Bul óte qýantarlyq jait, – dedi oblys ákimi Danial Ahmetov.
Shyǵys Qazaqstan oblysy men Eýropalyq bank arasyndaǵy bailanysty nyǵaitýǵa qarjy uiymy da múddeli eken. Muny Brýno Balvanera myrza da aitty.
– Bul – meniń Qazaqstannyń Shyǵysyna jasaǵan alǵashqy saparym. Óńirlerińizdiń qai salada da áleýeti zor eken, ásirese týrizm men biznesti damytýǵa múmkindik mol. Sol sebepti endi osy salalarǵa qatysty jobalaryńyzdy da qarjylandyrýǵa daiyn ekenimizdi aitqym keledi. Al kóshe shamdaryn jańartý máselesine kelsek, bul óte tiimdi joba bolaiyn dep tur. Osy jumystyń nátijesinde sizder kem degende 50, áitpese 60 paiyz elektr qýatyn únemdeitin bolasyzdar.
Buǵan qosa Shyǵys Qazaqstanǵa qatysty joba ózge óńirlerdikimen salystyrǵanda innovatsiialyq ekenin de aitý kerek, – degen Balvanera myrza 2017 jyly qolǵa alynǵan joba eki kezeńnen turatynyn, onyń birinshisinde Óskemen men Semei qalalaryndaǵy kóshe shamdary jańartylǵanyn, al ekinshisi oblystaǵy 16 aýdan ortalyǵy men shaǵyn shaharlardy qamtitynyn habarlady.
Joba boiynsha aldaǵy ýaqytta oblys aýmaǵyndaǵy 225 myńnan astam turǵyny bar aýyl-qalalarda on myń jańa kóshe shamy ornatylmaq eken.
Aita keteiik, EQQDB Shyǵys Qazaqstan eldi mekenderin zamanaýi jaryqtandyrý júielerimen qamtý jobasyna shamamen segiz million eýro kóleminde qarjy bólmek. Atalǵan qaryz on jyl ishinde qaitarylýy tiis-tin.
