اتاپ ايتساق، تاراپتار وبلىسىمىزدىڭ قالالارى مەن اۋدان ورتالىقتارىنداعى كوشە شامدارىن جاڭارتۋ جونىندەگى كەلىسىمشارتقا قول قويدى. اتالمىش راسىمگە وبلىس اكىمى دانيال احمەتوۆ پەن ەققدب-نىڭ ورتالىق ازيا ەلدەرىندەگى باسقارۋشى ديرەكتورى برۋنو بالۆانەرا قاتىستى.
شىعىس قازاقستانعا العاش رەت كەلىپ تۇرعان مارتەبەلى مەيمانعا ايماقتىڭ الەۋمەتتىك-ەكونوميكالىق احۋالى تۋرالى قىسقاشا ماعلۇمات بەرگەن دانيال كەنجەتاي ۇلى وبلىسىمىز اتالعان قارجى ۇيىمىمەن ارىپتەستىكتى ودان ءارى نىعايتۋعا نيەتتى ەكەنىن ءمالىم ەتتى.
– سىزدەردىڭ بانكتەرىڭىزبەن بىرلەسكەن جوبالارىمىز وتە كوپ. بۇل سوزىمە بانكتىڭ قازاقستانداعى جوبالارىنىڭ 29 پايىزى ءبىزدىڭ وبلىسقا تيەسىلى ەكەنى دالەل بولا الادى. ەندى وسى ارىپتەستىگىمىزدى جاڭا دەڭگەيگە كوتەرگىمىز كەلەدى. ەسىڭىزدە بولسا، 90-شى جىلدارى ەۋروپالىق قايتا قۇرۋ جانە دامۋ بانكىنىڭ قارجىلاي قولداۋى ەلىمىزدىڭ ءىرى قالالارىنا قاتىستى جوبالارمەن عانا شەكتەلەتىن. ال قازىرگى جاعداي باسقا، قارجى ۇيىمى وبلىستارداعى، اۋداندارداعى جوبالارعا دا قىزىعۋشىلىق تانىتا باستادى. بۇل وتە قۋانتارلىق جايت، – دەدى وبلىس اكىمى دانيال احمەتوۆ.
شىعىس قازاقستان وبلىسى مەن ەۋروپالىق بانك اراسىنداعى بايلانىستى نىعايتۋعا قارجى ۇيىمى دا مۇددەلى ەكەن. مۇنى برۋنو بالۆانەرا مىرزا دا ايتتى.
– بۇل – مەنىڭ قازاقستاننىڭ شىعىسىنا جاساعان العاشقى ساپارىم. وڭىرلەرىڭىزدىڭ قاي سالادا دا الەۋەتى زور ەكەن، اسىرەسە تۋريزم مەن بيزنەستى دامىتۋعا مۇمكىندىك مول. سول سەبەپتى ەندى وسى سالالارعا قاتىستى جوبالارىڭىزدى دا قارجىلاندىرۋعا دايىن ەكەنىمىزدى ايتقىم كەلەدى. ال كوشە شامدارىن جاڭارتۋ ماسەلەسىنە كەلسەك، بۇل وتە ءتيىمدى جوبا بولايىن دەپ تۇر. وسى جۇمىستىڭ ناتيجەسىندە سىزدەر كەم دەگەندە 50، ايتپەسە 60 پايىز ەلەكتر قۋاتىن ۇنەمدەيتىن بولاسىزدار.
بۇعان قوسا شىعىس قازاقستانعا قاتىستى جوبا وزگە وڭىرلەردىكىمەن سالىستىرعاندا يننوۆاسيالىق ەكەنىن دە ايتۋ كەرەك، – دەگەن بالۆانەرا مىرزا 2017 جىلى قولعا الىنعان جوبا ەكى كەزەڭنەن تۇراتىنىن، ونىڭ بىرىنشىسىندە وسكەمەن مەن سەمەي قالالارىنداعى كوشە شامدارى جاڭارتىلعانىن، ال ەكىنشىسى وبلىستاعى 16 اۋدان ورتالىعى مەن شاعىن شاھارلاردى قامتيتىنىن حابارلادى.
جوبا بويىنشا الداعى ۋاقىتتا وبلىس اۋماعىنداعى 225 مىڭنان استام تۇرعىنى بار اۋىل-قالالاردا ون مىڭ جاڭا كوشە شامى ورناتىلماق ەكەن.
ايتا كەتەيىك، ەققدب شىعىس قازاقستان ەلدى مەكەندەرىن زاماناۋي جارىقتاندىرۋ جۇيەلەرىمەن قامتۋ جوباسىنا شامامەن سەگىز ميلليون ەۋرو كولەمىندە قارجى بولمەك. اتالعان قارىز ون جىل ىشىندە قايتارىلۋى ءتيىس-تىن.
