«Nurly jer» baǵdarlamasy aiasynda oblys ortalyǵynyń kezekte turǵan otbasylary qonys toiyn toilady.
Búgin halyqaralyq balalardy qorǵaý merkesi qarsańynda páter kiltterin tabystap, kópbalaly otbasylarǵa qýanysh syilap otyrmyz. Balalar men kópbalaly analarǵa qamqorlyq tanytý bizdiń mindetimiz. Óitkeni olar - el bolashaǵy, - dedi Danial Ahmetov óz quttyqtaý sózinde.
Eki-úsh bólmeli páterler oblys ortalyǵyndaǵy 19 yqsham aýdanynda ornalasqan jańa úiden berildi.
Bul kópqabatty turǵyn úi arnaiy kópbalaly jáne az qamtylǵan otbasylarǵa arnalyp turǵyzylǵan. Janynda zamanaýi balalar alańy, mektep pen balabaqsha bar.
Bes bala tárbielep otyrǵan Mogilevter otbasy segiz jyldan beri kezekte turyp, búgin úsh bólmeli páter kiltine ie boldy.
– Biz óte qýanyshtymyz. Memlekettik qoldaý men oblys basshylyǵyna sheksiz alǵysymyzdy bildiremiz. Kópjylǵy jaldamaly páterden sharshaǵan balalarymyz keń úide, aýlada oinaityn bolady, - deidi qýanyshty ana Tatiana Mogileva.
Aita ketsek, ótken jyly kezekte turǵan 523 kóp balaly otbasy jańa qonysqa ie boldy, onyń ishinde aýyldy jerde turatyndarǵa da basymdylyq berildi.
Oblys ákimi aityp ótkendei, biyldan bastap turǵyn-úi kezeginde turǵan atalǵan sanattaǵy shyǵysqazaqstandyqtar 2022 jylǵa deiin tolyqtai baspanamen qamtylatyn bolady.
