Jahandaný jaǵdaiynda Shyǵys Qazaqstan oblysy halyqaralyq áriptestikti belsendi damytyp, álemniń túkpir-túkpirinen investorlar úshin tartymdy alańǵa ainalýda. Óńir Aýstriia, Belarýs, Izrail, Úndistan, Qytai, Resei, Túrkiia, Ońtústik Koreia jáne Ózbekstan siiaqty eldermen yntymaqtastyq týraly kelisimder men ózara túsinistik memorandýmdaryna qol qoidy. Áriptestik aiasynda ekonomika, aýyl sharýashylyǵy, densaýlyq saqtaý, týrizm jáne ónerkásip siiaqty salalar qamtylǵan,- dep habarlaidy Dalanews.kz
Investitsiialyq tartymdylyqty arttyrý úshin oblysta investorlarmen ózara árekettesý protsesin jeńildetetin «bir tereze» qaǵidaty engizildi. Ulttyq jobalar pýlyna jalpy quny 875,4 mlrd teńgeni quraityn 52 investitsiialyq joba engizilgen. Olardyń jeteýi sheteldik kompaniialardyń qatysýymen iske asyrylýda. Bul halyqaralyq bastamalardyń jalpy quny - 346 mlrd teńge, al iske asyrý merzimi 2033 jylǵa deiingi kezeńdi qamtidy.
Óńirde 2024 jyly jalpy somasy 45 mlrd teńgege 10 investitsiialyq joba iske asyryldy. Olardyń qatarynda túrik investory Balkash Ismaildyń qatysýymen «KAZMETALEXPORT» JShS júzege asyrǵan tústi metall synyqtaryn qaita óńdeý zaýytynyń qurylysy da bar (1,5 mlrd teńge).
Nemistiń «HMS Bergbau AG» kompaniiasynyń qatysýymen eki iri joba iske qosylýǵa daiyndalýda. Kompaniia 500 mln AQSh dollarynan astam investitsiia salýdy josparlap otyr. «Alataý Litii» JShS-men birlesip litii óndiretin ken-baiytý kombinaty, al «Creada Corporation» JShS-men birge litii totyǵy kontsentratyn óndirýge arnalǵan pegmatit kenderin óńdeitin kásiporyn salynady.
Sonymen qatar, Óskemen armatýra zaýytynda sheteldik investordyń qatysýymen óndiristik qýattardy jańǵyrtý jobasy iske asyrylyp jatyr. Investitsiia kólemi – 5 milliard teńge.
Ridder qalasynda ekologiialyq joba da daiyndyq satysynda. Leninogor GES kaskadyna kiretin Tishin sý qoimasynyń bir bóligin tazartý josparlanýda. Joba bastamashysy - «Altai Temir» JShS, al investory - Qytaidyń Úrimshi qalasyndaǵy «YEMA GROUP CO. LTD» korporatsiiasy. Jobaǵa aldyn ala eseppen 6,5 mlrd teńge kóleminde qarajat quiylady.
Bul bastamalar Shyǵys Qazaqstannyń halyqaralyq kapital men tehnologiialardy tartatyn ortalyqqa ainalyp, jańa jumys oryndary qurylyp, óńir turǵyndarynyń ál-aýqaty artyp kele jatqanyn kórsetedi.
