Shalǵai aýyldardyń biri – bar bolǵany 259 turǵyny bar Asýsaida búgin jańa meditsinalyq pýnkt iske qosyldy.
«Aýyldyq densaýlyq saqtaýdy jańǵyrtý» ulttyq jobasy aiasynda Tarbaǵatai aýdanynda ashylǵan bul pýnkt aýyl turǵyndarynyń aýdan ortalyǵyna barmai-aq sapaly meditsinalyq kómek alýyna múmkindik beredi.
Aita ketý kerek, Asýsai aýylynda 1991 jyldan beri áleýmettik nysandar salynbaǵan. Burynǵy jalǵyz emdeý-profilaktikalyq mekeme 1983 jyly salynǵan eski ǵimaratta ornalasqan edi. Endi barlyq qajetti injenerlik infraqurylymy tartylǵan jańa meditsinalyq pýnkt boi kóterdi.
Bul tiptik meditsinalyq pýnkttiń qurylysy 2024 jyldyń mamyr aiynda bastalyp, KAZPROFSTROY HOLDING JShS merdigerlik uiymy qurylys-montaj jumystaryn tolyǵymen aiaqtady.
Jańa meditsinalyq pýnkt qajetti meditsinalyq qural-jabdyqtarmen jáne jihazben tolyqtai qamtamasyz etilgen, bul aýyl turǵyndarynyń densaýlyǵyn nyǵaitýǵa, ýaqtyly profilaktikalyq jumystar júrgizýge jáne skriningtik tekserýler ótkizýge múmkindik beredi.
2023-2024 jyldary pilottyq ulttyq joba aiasynda óńirde 36 meditsinalyq nysannyń (7 dárigerlik ambýlatoriia, 2 feldsherlik-akýsherlik pýnkt, 27 meditsinalyq pýnkt) qurylysy josparlanǵan.
Ótken jyldyń qorytyndysy boiynsha 17 meditsinalyq pýnkt paidalanýǵa berildi. Sonymen qatar Tarbaǵatai aýdanynyń Jambyl jáne Baitoǵas aýyldaryndaǵy meditsinalyq pýnktter de óz esikterin dúisenbi kúni ashpaq.
