Shyǵys Qazaqstan oblysy aýdandarynda sý tasqyny qaýpi bar aimaqtar tekserilýde. Sý tasqynynyń aldyn alý jumystary jalǵasýda, táýlik boiy kezekshilik qyzmeti uiymdastyrylǵan. Jaǵdai jedel shtab pen óńir basshysynyń baqylaýynda, – dep habarlaidy Dalanews.kz ShQO ákiminiń baspasóz qyzmetine silteme jasap.
Ulan aýdanynda ákimdik sý tasqyny qaýpi kartasyna engizilgen aýmaqtardy turaqty baqylaýda ustap otyr. Gerasimovka aýylynyń mańynda egistik alqaptarynan erigen sý qarqyndy aǵyp jatyr. Sý tasqynynyń aldyn alý úshin sý burý arnasy tereńdetilip, inertti materialdarmen bekitý jumystary júrgizildi. Turǵyn úilerge sý kirgen joq. Úsh aýladan erigen sýlar sorylyp shyǵaryldy.
Qazir barlyq qajetti sý tasqynyna qarsy sharalar atqarylýda. Aýylǵa oblys ákimi bardy. Saqtaǵanov N.A. jergilikti jerde bolyp, ainalma kanal jaǵalaýyn bekitý, aryqtardy tereńdetý jáne tazalaý boiynsha tapsyrmalar berdi. Úlken sý esh kedergisiz aǵýy tiis.
– Barlyq qyzmetter kúsheitilgen daiyndyq rejiminde jumys istep jatyr. Merekege qaramastan, eshkimge bosańsýǵa bolmaidy. Qajet bolǵan jaǵdaida sý tasqynynyń aldyn alý jáne aýmaqty qorǵaý úshin qosymsha tehnika tartylady. Bul kúnderi oblys turǵyndary alańsyz Naýryz merekesin toilaýy kerek. Al biz olardyń qaýipsizdigi úshin barlyq qajetti jaǵdaidy jasaimyz, – dedi Nurymbet Saqtaǵanov.
Tarbaǵatai aýdanynda sý tasqyny qaýpi bar aimaqtar, sonyń ishinde Mańyraq taýynyń kúngei beti, Qara Toǵam, Esengeldi jáne Barǵana óńirleri tekserildi.
Altai aýdanynda ózenderdiń muz qatparlary buzylýda. Aýa raiy men sý deńgeii saǵat saiyn baqylanyp, jaǵdai qatań baqylaýda. Úlken Naryn aýylyndaǵy Altaienergo kóshesinde sharýashylyq qurylysynyń janynda erigen sýdyń jinalýy baiqaldy. Alaida turǵyn úige qaýip joq, óitkeni jaqyn mańda damba ornalasqan, al sý ainalma kanalǵa aǵyzylýda. Qazirgi ýaqytta kanal tazartylyp, sý birtindep ketýde. Tótenshe jaǵdailar qyzmeti men jergilikti atqarýshy organdar jaǵdaidy qadaǵalap otyr. Qorǵaý qurylystaryn daiyndaý jáne nyǵaitý úshin barlyq qajetti sharalar qabyldandy. Inertti materialdar men arnaiy tehnika daiyn.
