شىعىس قازاقستان وبلىسى اۋداندارىندا سۋ تاسقىنى ءقاۋپى بار ايماقتار تەكسەرىلۋدە. سۋ تاسقىنىنىڭ الدىن الۋ جۇمىستارى جالعاسۋدا، تاۋلىك بويى كەزەكشىلىك قىزمەتى ۇيىمداستىرىلعان. جاعداي جەدەل شتاب پەن ءوڭىر باسشىسىنىڭ باقىلاۋىندا، – دەپ حابارلايدى Dalanews.kz شقو اكىمىنىڭ باسپا ءسوز قىزمەتىنە سىلتەمە جاساپ.
ۇلان اۋدانىندا اكىمدىك سۋ تاسقىنى ءقاۋپى كارتاسىنا ەنگىزىلگەن اۋماقتاردى تۇراقتى باقىلاۋدا ۇستاپ وتىر. گەراسيموۆكا اۋىلىنىڭ ماڭىندا ەگىستىك القاپتارىنان ەرىگەن سۋ قارقىندى اعىپ جاتىر. سۋ تاسقىنىنىڭ الدىن الۋ ءۇشىن سۋ بۇرۋ ارناسى تەرەڭدەتىلىپ، ينەرتتى ماتەريالدارمەن بەكىتۋ جۇمىستارى جۇرگىزىلدى. تۇرعىن ۇيلەرگە سۋ كىرگەن جوق. ءۇش اۋلادان ەرىگەن سۋلار سورىلىپ شىعارىلدى.
ءقازىر بارلىق قاجەتتى سۋ تاسقىنىنا قارسى شارالار اتقارىلۋدا. اۋىلعا وبلىس اكىمى باردى. ساقتاعانوۆ ن.ا. جەرگىلىكتى جەردە بولىپ، اينالما كانال جاعالاۋىن بەكىتۋ، ارىقتاردى تەرەڭدەتۋ جانە تازالاۋ بويىنشا تاپسىرمالار بەردى. ۇلكەن سۋ ەش كەدەرگىسىز اعۋى ءتيىس.
– بارلىق قىزمەتتەر كۇشەيتىلگەن دايىندىق رەجيمىندە جۇمىس ىستەپ جاتىر. مەرەكەگە قاراماستان، ەشكىمگە بوساڭسۋعا بولمايدى. قاجەت بولعان جاعدايدا سۋ تاسقىنىنىڭ الدىن الۋ جانە اۋماقتى قورعاۋ ءۇشىن قوسىمشا تەحنيكا تارتىلادى. بۇل كۇندەرى وبلىس تۇرعىندارى الاڭسىز ناۋرىز مەرەكەسىن تويلاۋى كەرەك. ال ءبىز ولاردىڭ قاۋىپسىزدىگى ءۇشىن بارلىق قاجەتتى جاعدايدى جاسايمىز، – دەدى نۇرىمبەت ساقتاعانوۆ.
تارباعاتاي اۋدانىندا سۋ تاسقىنى ءقاۋپى بار ايماقتار، سونىڭ ىشىندە ماڭىراق تاۋىنىڭ كۇنگەي بەتى، قارا توعام، ەسەنگەلدى جانە بارعانا وڭىرلەرى تەكسەرىلدى.
التاي اۋدانىندا وزەندەردىڭ مۇز قاتپارلارى بۇزىلۋدا. اۋا رايى مەن سۋ دەڭگەيى ساعات سايىن باقىلانىپ، جاعداي قاتاڭ باقىلاۋدا. ۇلكەن نارىن اۋىلىنداعى التايەنەرگو كوشەسىندە شارۋاشىلىق قۇرىلىسىنىڭ جانىندا ەرىگەن سۋدىڭ جينالۋى بايقالدى. الايدا تۇرعىن ۇيگە ءقاۋىپ جوق، ويتكەنى جاقىن ماڭدا دامبا ورنالاسقان، ال سۋ اينالما كانالعا اعىزىلۋدا. قازىرگى ۋاقىتتا كانال تازارتىلىپ، سۋ بىرتىندەپ كەتۋدە. توتەنشە جاعدايلار قىزمەتى مەن جەرگىلىكتى اتقارۋشى ورگاندار جاعدايدى قاداعالاپ وتىر. قورعاۋ قۇرىلىستارىن دايىنداۋ جانە نىعايتۋ ءۇشىن بارلىق قاجەتتى شارالار قابىلداندى. ينەرتتى ماتەريالدار مەن ارنايى تەحنيكا دايىن.
