ShQO ákimi Ermek Kósherbaev óńirdiń qoǵam múshelerimen birge Qoǵamdyq keńes janynan turaqty túrde jumys isteitin «Óskemen tynysy» ekologiialyq qorǵaý biýrosyn» qurý týraly usynysty talqylady, – dep habarlaidy Dalanews.kz ShQO ákiminiń baspasóz qyzmetine silteme jasap.
Jańa uiymnyń maqsaty – aýa sapasyna qatysty qordalanǵan máselelerdiń sheshimin izdep, óskemendikterdiń turmys jaǵdaiyn jaqsartý. Atap aitqanda, qalanyń ár aýdanynda atmosferaǵa monitoring jasaityn qurylǵylardy ornatý, ony kalibrleý, kásiporyndardaǵy súzgini jaqsartý, qoldanystaǵy sharalardyń tiimdiligin baǵalaý, jańa usynystar ázirleý, turǵyndarǵa aýa lastanýynyń qaýip-qateri men ony azaitýdyń joldaryn túsindirý úshin bilim berý baǵdarlamalaryn uiymdastyrý, ekologiialyq standarttardyń oryndalýyn baqylaý.
Aimaq basshysy «Óskemen tynysy» ekologiialyq qorǵaý biýrosynyń» jol kartasyn jasaqtaýdan bastap, qalanyń ekologiialyq jobalaryn júzege asyrýdy jedeldetý jumystarymen ainalysatynyn alǵa tartty.
– Qoǵamnyń, jergilikti atqarýshy organdardyń jáne tabiǵatty paidalanýshylardyń ózara qarym-qatynasynyń tiimdi tetikteri qajet ekenin budan buryn da aitqan edim. Ekobelsendiler memlekettik organdar men kásiporyndarmen dialog ornatý arqyly máseleni sheshý joldaryn qarastyratyn bolady. Eń bastysy, qoǵamdyq baqylaý kúsheitiledi. Qalanyń árbir turǵyny osy uiymnyń zańdy ókili dep aitýǵa negiz bar. Árine bári birden ózgerip ketpeitini anyq. Biraq birlese otyryp, kezeń-kezeńimen qalaǵan nátijege qol jetkizetin bolamyz, – dedi Ermek Kósherbaev.
Osy rette qoǵam belsendileri de bastamany qoldap, ózderiniń pikirin bildirdi.
– Atmosferanyń lastaný deńgeiin anyqtaityn datchikterdiń sanyn kóbeitip, olardy qala boiynsha birkelki ornatý kerek. Turǵyndar da qandai kómir jaǵatynymyzdy bilýi qajet. Bul baǵyttaǵy jumysty jer úiler ornalasqan aýdandarda qarastyrǵan jón. Oń ózgerister úshin biýro jumysynda ár qadam mańyzdy, – dedi sala mamany Vitalii Chernetskii.
Oblys ákimi jańa keńesti QR Ekologiia jáne tabiǵi resýrstar ministrligi qoǵamdyq keńesiniń múshesi, «ECOJER» Assotsiatsiiasy ShQO boiynsha filialynyń jetekshisi Elena Berezinskaia-Ábilovaǵa basqarýdy usyndy.
– Sońǵy 10 jyldyń ishinde alǵash ret qorshaǵan ortanyń jaǵdaiyn talqylap, ekologiialyq qorǵaý biýrosyn qurý jóninde sheshim qabyldaý úshin ekologtar men táýelsiz sarapshylar shaqyryldy. Ekologiialyq máselelerdi sheshýde qoǵammen belsendi qarym-qatynas ornatý qajet. Atqarylyp jatqan jumystar jurtshylyqqa ashyq túrde kórsetilýi kerek, – deidi Elena Berezinskaia-Ábilova.
Ekologiialyq qorǵaý biýrosynyń quramyna ekologiialyq, áleýmettik jáne densaýlyq saqtaý máselelerin sheshýge kómektesetin túrli sala mamandaryn qosý josparlanyp otyrǵanyn atap ótken jón. Sonymen qatar, atalǵan biýro azamattar, kásip pen bilik arasyndaǵy ózara árekettesý alańyna ainalady dep kútilýde.
