Óz kezeginde Tilo Klinner Shyǵys Qazaqstan oblysynyń ekonomikalyq áleýeti nemis kásipkerlerin qatty qyzyqtyratynyn alǵa tartty. Sol sebepti ol nemis kásipkerleriniń basyn qosyp ShQO-ǵa kelgenin aitty.
Germaniiadan kelgen kásipkerler birinshi kezekte «Qazmyrysh» jáne «Úlbi metallýrgiia zaýytynyń» jumysymen tanysty. Budan keiin elshi bastaǵan kásipkerlerdi aimaq basshysy Danial Ahmetov qabyldap, ózara pikir almasty.
– Shyǵys Qazaqstan oblysyna jasaǵan jumys saparlaryńyzdyń barysynda óńirdiń ekonomikalyq múmkindigi jaiynda mol málimet alǵandaryńyzǵa senimdimin. Elshi myrza, sizdiń buǵan deiin bizdiń oblysymyzǵa jasaǵan jumys saparyńyzda birlesip jumys isteý, arnaiy jumys tobyn qurý týrasynda oi bólisken edik. Osy rette bizder sizge hat joldap Shyǵys Qazaqstan oblysy Eýropadaǵy jetekshi el Germaniiamen aýyl sharýashylyǵy, bilim, densaýlyq saqtaý jáne týrizm salasynda yntamaqtastyq ornatýǵa múddeli ekenimizdi atap kórsetkenbiz. Búgin sol ortaq maqsatymyzǵa alǵashqy qadam jasalyndy, – dep ShQO ákimi Danial Ahmetov oiyn ortaǵa saldy.
Óz kezeginde elshi Tilo Klinner myrza birneshe jyldan beri Qazaqstanda jumys istep kele jatqan SAP Kazakhstan IT kompaniiasy «Qazmyrysh» jáne «Aziia Avto» kompaniialarymen áriptestik qarym-qatynasty damytý baǵytynda memorandýmǵa qol qoiǵanyn alǵa tartty.
Aitalyq, «Aziia Avto» kompaniiasymen memorandýmǵa qol qoiǵan SAP Kazakhstan aldaǵy ýaqytta D.Serikbaev atyndaǵy Shyǵys Qazaqstan memlekettik tehnikalyq ýniversitetiniń bazasynda óziniń ortalyǵyn ashýǵa niettenip otyr. Budan basqa nemis investorlary ShQO-da qaldyqtardy óńdeitin fabrika salý máselesin de qozǵaǵanyn aita ketýimiz kerek.
– Qurmetti ákim myrza, Sizge jazǵan sońǵy hatymda Qazaqstan saraptamalyq bilim salasyn damytýǵa qatysty óz oiymda aitqan edim. Bizdiń Fridberg dep atalatyn qalamyzda dál osy baǵytta jumys isteitin ýniversitet bar. Aldaǵy ýaqytta bizdiń ýniversitet pen D.Serikbaev atyndaǵy ShQMTÝ ózara yntmaqtasyp jumys isteý máselesin talqylaýǵa bolady. Bul baǵytta eki jaqtyń múmkindigi joǵary dep bilemin. Sonymen qatar Qazaqstan Prezidenti Qasym-Jomart Toqaev Berlinge kelgen sátinde qaldyqtardy óńdeitin fabrika salý máselesin sóz etken-di. Aldaǵy ýaqytta bizder bul baǵytta jumys istep, úlken jetistikterge jetetinimizge senimdimin, – dep elshi Tilo Klinner myrza eki eldiń arasyndaǵy yntymaqtastyqqa keleshegi zor ekenin tilge tiek etti.
