شىعىس قازاقستان وبلىسى اكىمى دانيال احمەتوۆ قازاقستانداعى گەرمانيانىڭ توتەنشە وكىلەتتى ەلشىسى تيلو كليننەرمەن كەزدەسىپ، ەكونوميكالىق ارىپتەستىك ماسەلەلەرىن ءسوز ەتتى. ايماققا جاساعان ساپارى بارىسىندا نەمىس ەلشىسى وزىمەن بىرگە گەرمانيادان كەلگەن ءبىر توپ كاسىپكەرلەردى ەرتە كەلگەنىن ايتا كەتۋىمىز كەرەك.

ءوز كەزەگىندە تيلو كليننەر شىعىس قازاقستان وبلىسىنىڭ ەكونوميكالىق الەۋەتى نەمىس كاسىپكەرلەرىن قاتتى قىزىقتىراتىنىن العا تارتتى. سول سەبەپتى ول نەمىس كاسىپكەرلەرىنىڭ باسىن قوسىپ شقو-عا كەلگەنىن ايتتى.

گەرمانيادان كەلگەن كاسىپكەرلەر ءبىرىنشى كەزەكتە «قازمىرىش» جانە «ءۇلبى مەتاللۋرگيا زاۋىتىنىڭ» جۇمىسىمەن تانىستى. بۇدان كەيىن ەلشى باستاعان كاسىپكەرلەردى ايماق باسشىسى دانيال احمەتوۆ قابىلداپ، ءوزارا پىكىر الماستى.



– شىعىس قازاقستان وبلىسىنا جاساعان جۇمىس ساپارلارىڭىزدىڭ بارىسىندا ءوڭىردىڭ ەكونوميكالىق مۇمكىندىگى جايىندا مول مالىمەت العاندارىڭىزعا سەنىمدىمىن. ەلشى مىرزا، ءسىزدىڭ بۇعان دەيىن ءبىزدىڭ وبلىسىمىزعا جاساعان جۇمىس ساپارىڭىزدا بىرلەسىپ جۇمىس ىستەۋ، ارنايى جۇمىس توبىن قۇرۋ تۋراسىندا وي بولىسكەن ەدىك. وسى رەتتە بىزدەر سىزگە حات جولداپ شىعىس قازاقستان وبلىسى ەۋروپاداعى جەتەكشى ەل گەرمانيامەن اۋىل شارۋاشىلىعى، ءبىلىم، دەنساۋلىق ساقتاۋ جانە تۋريزم سالاسىندا ىنتاماقتاستىق ورناتۋعا مۇددەلى ەكەنىمىزدى اتاپ كورسەتكەنبىز. بۇگىن سول ورتاق ماقساتىمىزعا العاشقى قادام جاسالىندى، – دەپ شقو اكىمى دانيال احمەتوۆ ويىن ورتاعا سالدى.

ءوز كەزەگىندە ەلشى تيلو كليننەر مىرزا بىرنەشە جىلدان بەرى قازاقستاندا جۇمىس ىستەپ كەلە جاتقان SAP Kazakhstan IT كومپانياسى «قازمىرىش» جانە «ازيا اۆتو» كومپانيالارىمەن ارىپتەستىك قارىم-قاتىناستى دامىتۋ باعىتىندا مەموراندۋمعا قول قويعانىن العا تارتتى.

ايتالىق، «ازيا اۆتو» كومپانياسىمەن مەموراندۋمعا قول قويعان SAP Kazakhstan الداعى ۋاقىتتا د.سەرىكبايەۆ اتىنداعى شىعىس قازاقستان مەملەكەتتىك تەحنيكالىق ۋنيۆەرسيتەتىنىڭ بازاسىندا ءوزىنىڭ ورتالىعىن اشۋعا نيەتتەنىپ وتىر. بۇدان باسقا نەمىس ينۆەستورلارى شقو-دا قالدىقتاردى وڭدەيتىن فابريكا سالۋ ماسەلەسىن دە قوزعاعانىن ايتا كەتۋىمىز كەرەك.    

– قۇرمەتتى اكىم مىرزا، سىزگە جازعان سوڭعى حاتىمدا قازاقستان ساراپتامالىق ءبىلىم سالاسىن دامىتۋعا قاتىستى ءوز ويىمدا ايتقان ەدىم. ءبىزدىڭ فريدبەرگ دەپ اتالاتىن قالامىزدا ءدال وسى باعىتتا جۇمىس ىستەيتىن ۋنيۆەرسيتەت بار. الداعى ۋاقىتتا ءبىزدىڭ ۋنيۆەرسيتەت پەن د.سەرىكبايەۆ اتىنداعى شقمتۋ ءوزارا ىنتماقتاسىپ جۇمىس ىستەۋ ماسەلەسىن تالقىلاۋعا بولادى. بۇل باعىتتا ەكى جاقتىڭ مۇمكىندىگى جوعارى دەپ بىلەمىن. سونىمەن قاتار قازاقستان پرەزيدەنتى قاسىم-جومارت توقايەۆ بەرلينگە كەلگەن ساتىندە قالدىقتاردى وڭدەيتىن فابريكا سالۋ ماسەلەسىن ءسوز ەتكەن-دى. الداعى ۋاقىتتا بىزدەر بۇل باعىتتا جۇمىس ىستەپ، ۇلكەن جەتىستىكتەرگە جەتەتىنىمىزگە سەنىمدىمىن، – دەپ ەلشى تيلو كليننەر مىرزا ەكى ەلدىڭ اراسىنداعى ىنتىماقتاستىققا كەلەشەگى زور ەكەنىن تىلگە تيەك ەتتى.