Óńir basshysynyń aıtýynsha, Shyǵys Qazaqstanda 40 ınfeksıalyq stasıonar daıyndalyp, tolyq jabdyqtalǵan 6 myńnan astam tósek-oryn uıymdastyryldy. Qazirgi ýaqytta 3,7 myń tósek-oryn bar. Sonymen qatar oblys ákimi aǵymdaǵy jyldyń aqpan aıynan bastap naýqastarǵa arnalǵan tósek-oryn sany 12 esege, reanımasıalyq tósek-oryn sany 10 esege artqanyn málim etti.
- Bul óz kezeginde oryn tapshylyǵyna jol bermeı, pasıentterdi jaıǵastyrý algorıtmin eskere otyryp, ınfeksıalyq stasıonarlardaǵy tósek-oryn sanyn arttyrýǵa múmkindik beredi. Infeksıalyq bólimshelerdiń barlyq pasıentteri oksıgenoterapıamen tolyq qamtamasyz etilgen. Aýyr naýqastar úshin ımýndyq plazmanyń 3 myńnan astam dozasy daıyndaldy. Bul búkil respýblıka boıynsha ázirlengen dozanyń 62,5%-na teń. Qazirgi ýaqytta 180 pasıentke plazma quıyldy. Plazma bankin toltyrý boıynsha donorlarmen jumys jalǵasýda, - dedi aımaq basshysy.
Sonymen qatar dári-dármekter men jeke qorǵanys quraldarynyń turaqtandyrý qory quryldy. Emdeýdiń tıimdiligi úshin koronavırýs ınfeksıasynyń jeńil jáne ortasha aýyrlyǵy bar 6200 naýqasty osy dári-dármekpen qamtamasyz etý esebinen favıpıravır preparaty satyp alyndy. Preparat 12 qarashadan bastap pasıentterdiń kelisimimen oblystyń aýrýhanalarynda qoldanylatyn bolady.
Táýlik boıy jáne demalyssyz 15 kompúterlik tomograf jumys isteıdi. 1 jeltoqsannan bastap qosymsha 3 jańa KT apparaty pasıentterdi dıagnostıkalaýdy bastaıdy. Sonymen qatar, aýyl turǵyndaryn ýaqtyly medısınalyq kómekpen qamtamasyz etý úshin jumys istep turǵan 6 jyljymaly medısınalyq keshenge 10 jańa keshen qosyldy.
Medısınalyq jabdyqtarmen tolyq jınaqtalǵan jedel medısınalyq járdem kóliginiń parki 216 avtokólikpen tolyǵady. Onyń 88-i qazirdiń ózinde jumys istep tur, qalǵan 128-i 10 jeltoqsanǵa deıin jetkiziledi. Jalpy, óńirdegi jedel járdem kólikteriniń sany 2,5 esege kóbeıdi.
- Jaǵdaıdy baqylaý jáne jedel sharalar qabyldaý úshin KVI oshaqtaryn oqshaýlaý ortalyǵy quryldy, ol bes sıfrlyq modýldi biriktirip, medepıdbrıgadalardyń jumysyn úılestiredi. Mundaı júıe ınfeksıanyń taralýyna qarsy kúres boıynsha shuǵyl sharalar qabyldaýdy jedeldetýge, juqtyrǵan jáne baılanysta bolǵan adamdar týraly mańyzdy aqparattardy alýǵa, emdeý barysyn jáne karantındik shekteýlerdiń saqtalýyn qadaǵalaýǵa múmkindik beredi, – dep atap ótti Danıal Ahmetov.
Shyǵys Qazaqstan PTR zerthanalardyń sany boıynsha jetekshi oblystardyń qatarynda. Pandemıanyń barlyq kezeńinde PTR ádisimen 350 myńnan astam adam tekserýden ótti. COVID-19 koronavırýsyn ýaqtyly dıagnostıkalaý jáne qoljetimdilikti arttyrý úshin jumys istep turǵan 13 PTR zerthanaǵa jergilikti búdjet esebinen qýattylyǵy táýligine 7 myń synamaǵa deıin jetetin qosymsha 7 zerthana ashylatyn bolady. Búgingi tańda tórteýi jumys istep tur, 20 qarashaǵa deıin taǵy úsheýi iske qosylmaq. Barlyq PTR zerthanalar qýattylyǵy táýligine 16 myń synamaǵa deıin jetetin biryńǵaı oblystyq jelini quraıtyn bolady.
Óńir basshysy monıtorıń toptarynyń jumysy kúsheıtilgenin atap ótti. 1 qyrkúıekten 10 qarashaǵa deıin 4 myń reıd júrgizilip, 10 myńnan astam nysan qamtyldy. Sanıtarlyq erejeler men normalardy buza otyryp jumys isteıtin 1,5 myńǵa jýyq bıznes sýbektisi anyqtaldy. Osylaısha, jalpy somasy 70 mln. teńgege aıyppul salyndy.
Sonymen qatar Danıal Ahmetov demalys jáne mereke kúnderi azyq-túlik emes sektor nysandarynyń jumysyna tyıym salý, saýda ortalyqtarynyń, oıyn-saýyq mekemeleriniń jáne halyq kóp jınalatyn basqa da nysandardyń jumysyn shekteý boıynsha qabyldanǵan shekteý sharalary týraly eske saldy.
Jalpy, pandemıamen kúres aıasynda óńirdiń densaýlyq saqtaý salasyna qajetti jabdyqtar satyp alýǵa jáne negizgi quraldardy jańartýǵa 22 mlrd. teńgeden astam qarajat jumsaldy.
