ءوڭىر باسشىسىنىڭ ايتۋىنشا، شىعىس قازاقستاندا 40 ينفەكسيالىق ستاسيونار دايىندالىپ، تولىق جابدىقتالعان 6 مىڭنان استام توسەك-ورىن ۇيىمداستىرىلدى. قازىرگى ۋاقىتتا 3،7 مىڭ توسەك-ورىن بار. سونىمەن قاتار وبلىس اكىمى اعىمداعى جىلدىڭ اقپان ايىنان باستاپ ناۋقاستارعا ارنالعان توسەك-ورىن سانى 12 ەسەگە، رەانيماسيالىق توسەك-ورىن سانى 10 ەسەگە ارتقانىن ءمالىم ەتتى.
- بۇل ءوز كەزەگىندە ورىن تاپشىلىعىنا جول بەرمەي، پاسيەنتتەردى جايعاستىرۋ الگوريتمىن ەسكەرە وتىرىپ، ينفەكسيالىق ستاسيونارلارداعى توسەك-ورىن سانىن ارتتىرۋعا مۇمكىندىك بەرەدى. ينفەكسيالىق بولىمشەلەردىڭ بارلىق پاسيەنتتەرى وكسيگەنوتەراپيامەن تولىق قامتاماسىز ەتىلگەن. اۋىر ناۋقاستار ءۇشىن يممۋندىق پلازمانىڭ 3 مىڭنان استام دوزاسى دايىندالدى. بۇل بۇكىل رەسپۋبليكا بويىنشا ازىرلەنگەن دوزانىڭ 62،5%-نا تەڭ. قازىرگى ۋاقىتتا 180 پاسيەنتكە پلازما قۇيىلدى. پلازما بانكىن تولتىرۋ بويىنشا دونورلارمەن جۇمىس جالعاسۋدا، - دەدى ايماق باسشىسى.
سونىمەن قاتار دارى-دارمەكتەر مەن جەكە قورعانىس قۇرالدارىنىڭ تۇراقتاندىرۋ قورى قۇرىلدى. ەمدەۋدىڭ تيىمدىلىگى ءۇشىن كوروناۆيرۋس ينفەكسياسىنىڭ جەڭىل جانە ورتاشا اۋىرلىعى بار 6200 ناۋقاستى وسى دارى-دارمەكپەن قامتاماسىز ەتۋ ەسەبىنەن فاۆيپيراۆير پرەپاراتى ساتىپ الىندى. پرەپارات 12 قاراشادان باستاپ پاسيەنتتەردىڭ كەلىسىمىمەن وبلىستىڭ اۋرۋحانالارىندا قولدانىلاتىن بولادى.
تاۋلىك بويى جانە دەمالىسسىز 15 كومپيۋتەرلىك توموگراف جۇمىس ىستەيدى. 1 جەلتوقساننان باستاپ قوسىمشا 3 جاڭا كت اپپاراتى پاسيەنتتەردى دياگنوستيكالاۋدى باستايدى. سونىمەن قاتار، اۋىل تۇرعىندارىن ۋاقتىلى مەديسينالىق كومەكپەن قامتاماسىز ەتۋ ءۇشىن جۇمىس ىستەپ تۇرعان 6 جىلجىمالى مەديسينالىق كەشەنگە 10 جاڭا كەشەن قوسىلدى.
مەديسينالىق جابدىقتارمەن تولىق جيناقتالعان جەدەل مەديسينالىق جاردەم كولىگىنىڭ پاركى 216 اۆتوكولىكپەن تولىعادى. ونىڭ 88ء-ى ءقازىردىڭ وزىندە جۇمىس ىستەپ تۇر، قالعان 128ء-ى 10 جەلتوقسانعا دەيىن جەتكىزىلەدى. جالپى، وڭىردەگى جەدەل جاردەم كولىكتەرىنىڭ سانى 2،5 ەسەگە كوبەيدى.
- جاعدايدى باقىلاۋ جانە جەدەل شارالار قابىلداۋ ءۇشىن كۆي وشاقتارىن وقشاۋلاۋ ورتالىعى قۇرىلدى، ول بەس سيفرلىق ءمودۋلدى بىرىكتىرىپ، مەدەپيدبريگادالاردىڭ جۇمىسىن ۇيلەستىرەدى. مۇنداي جۇيە ينفەكسيانىڭ تارالۋىنا قارسى كۇرەس بويىنشا شۇعىل شارالار قابىلداۋدى جەدەلدەتۋگە، جۇقتىرعان جانە بايلانىستا بولعان ادامدار تۋرالى ماڭىزدى اقپاراتتاردى الۋعا، ەمدەۋ بارىسىن جانە كارانتيندىك شەكتەۋلەردىڭ ساقتالۋىن قاداعالاۋعا مۇمكىندىك بەرەدى، – دەپ اتاپ ءوتتى دانيال احمەتوۆ.
شىعىس قازاقستان پتر زەرتحانالاردىڭ سانى بويىنشا جەتەكشى وبلىستاردىڭ قاتارىندا. پاندەميانىڭ بارلىق كەزەڭىندە پتر ادىسىمەن 350 مىڭنان استام ادام تەكسەرۋدەن ءوتتى. COVID-19 كوروناۆيرۋسىن ۋاقتىلى دياگنوستيكالاۋ جانە قولجەتىمدىلىكتى ارتتىرۋ ءۇشىن جۇمىس ىستەپ تۇرعان 13 پتر زەرتحاناعا جەرگىلىكتى بيۋدجەت ەسەبىنەن قۋاتتىلىعى تاۋلىگىنە 7 مىڭ سىناماعا دەيىن جەتەتىن قوسىمشا 7 زەرتحانا اشىلاتىن بولادى. بۇگىنگى تاڭدا تورتەۋى جۇمىس ىستەپ تۇر، 20 قاراشاعا دەيىن تاعى ۇشەۋى ىسكە قوسىلماق. بارلىق پتر زەرتحانالار قۋاتتىلىعى تاۋلىگىنە 16 مىڭ سىناماعا دەيىن جەتەتىن ءبىرىڭعاي وبلىستىق جەلىنى قۇرايتىن بولادى.
ءوڭىر باسشىسى مونيتورينگ توپتارىنىڭ جۇمىسى كۇشەيتىلگەنىن اتاپ ءوتتى. 1 قىركۇيەكتەن 10 قاراشاعا دەيىن 4 مىڭ رەيد جۇرگىزىلىپ، 10 مىڭنان استام نىسان قامتىلدى. سانيتارلىق ەرەجەلەر مەن نورمالاردى بۇزا وتىرىپ جۇمىس ىستەيتىن 1،5 مىڭعا جۋىق بيزنەس سۋبەكتىسى انىقتالدى. وسىلايشا، جالپى سوماسى 70 ملن. تەڭگەگە ايىپپۇل سالىندى.
سونىمەن قاتار دانيال احمەتوۆ دەمالىس جانە مەرەكە كۇندەرى ازىق-تۇلىك ەمەس سەكتور نىساندارىنىڭ جۇمىسىنا تىيىم سالۋ، ساۋدا ورتالىقتارىنىڭ، ويىن-ساۋىق مەكەمەلەرىنىڭ جانە حالىق كوپ جينالاتىن باسقا دا نىسانداردىڭ جۇمىسىن شەكتەۋ بويىنشا قابىلدانعان شەكتەۋ شارالارى تۋرالى ەسكە سالدى.
جالپى، پاندەميامەن كۇرەس اياسىندا ءوڭىردىڭ دەنساۋلىق ساقتاۋ سالاسىنا قاجەتتى جابدىقتار ساتىپ الۋعا جانە نەگىزگى قۇرالداردى جاڭارتۋعا 22 ملرد. تەڭگەدەن استام قاراجات جۇمسالدى.
