«Protecting Business and Investments» jobasy 2018 jyly qolǵa alyndy. Bul Qazaqstan Respýblikasynyń sybailas jemqorlyqqa qarsy is-qimyl agenttigi men QR Investitsiialar jáne damý ministrliginiń birlesken jobasy. Elimizdegi barlyq óńirde arnaiy front keńseler ashylǵan.
Jiger Baidildinniń aitýynsha, Shyǵys Qazaqstanda osy joba aiasynda «Shyǵys – Adaldyq alańy» front keńsesi jumys isteidi. Atalmysh jobanyń músheleri jemqorlyqpen kúresý úshin kásipkerlerdiń biznes jobalaryn qorǵaýǵa, tiisti qujattaryn jinaýǵa kómek kórsetedi.
Mundaǵy basty maqsat – jaily investitsiialyq orta quryp, biznesmender men memlekettik organdar arasyndaǵy senimdilikti nyǵaitý.
Kásipkerlerdiń múddesin qorǵap, osy salada týyndaǵan barlyq máseleni jedel sheshý. Kásipkerlerge qoiylatyn eń basty talap – jemqorlyqtyń aldyn alý. Front keńseniń qyzmetine júginý úshin kásipker men departament qyzmetkerleri kelisimshartqa otyrady. Soǵan sáikes agenttik mamandary memlekettik qyzmetter men quqyqtyq-normativtik qyzmetterdi der kezinde alýǵa kómek beredi.
Búginde ShQO boiynsha 24 biznes sýbektisi ShQO boiynsha jemqorlyqpen kúres departamentimen kelisimshartqa otyrǵan. Aita keteiik, front keńsemen kelisimge qol qoiǵan kásipkerler osy kúnge deiin oblys biýdjetine 145 mlrd teńge kóleminde jalpy investitsiia quiǵan.
Joba júzege asyrylǵaly beri biznes salasynda oń ózgerister baiqalady.
– Bizdiń keńseniń qyzmetine "PROMOTHOD KAZAHSTAN" JShS-niń direktory júgindi. Aitýynsha, ShQO tabiǵi resýrstar jáne tabiǵat paidalanýdy retteý basqarmasy memlekettik ekologiialyq saraptamanyń qortyndysyn berýden bas tartypty. Budan soń bizdiń qyzmetkerler tekserý jumystaryn júrgizip, eki jaqty kelisimge keltirdi, – dedi Jiger Baidildin.
Aita keteiik, osy joba aiasynda 18 kásipker men investordyń quqyǵy qorǵaldy. Aldaǵy ýaqytta osy jumystary jalǵasyn tappaq.
