«Protecting Business and Investments» جوباسى 2018 جىلى قولعا الىندى. بۇل قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگى مەن ق ر ينۆەستيسيالار جانە دامۋ مينيسترلىگىنىڭ بىرلەسكەن جوباسى. ەلىمىزدەگى بارلىق وڭىردە ارنايى فرونت كەڭسەلەر اشىلعان.
جىگەر ءبايديلديننىڭ ايتۋىنشا، شىعىس قازاقستاندا وسى جوبا اياسىندا «شىعىس – ادالدىق الاڭى» فرونت كەڭسەسى جۇمىس ىستەيدى. اتالمىش جوبانىڭ مۇشەلەرى جەمقورلىقپەن كۇرەسۋ ءۇشىن كاسىپكەرلەردىڭ بيزنەس جوبالارىن قورعاۋعا، ءتيىستى قۇجاتتارىن جيناۋعا كومەك كورسەتەدى.
مۇنداعى باستى ماقسات – جايلى ينۆەستيسيالىق ورتا قۇرىپ، بيزنەسمەندەر مەن مەملەكەتتىك ورگاندار اراسىنداعى سەنىمدىلىكتى نىعايتۋ.
كاسىپكەرلەردىڭ مۇددەسىن قورعاپ، وسى سالادا تۋىنداعان بارلىق ماسەلەنى جەدەل شەشۋ. كاسىپكەرلەرگە قويىلاتىن ەڭ باستى تالاپ – جەمقورلىقتىڭ الدىن الۋ. فرونت كەڭسەنىڭ قىزمەتىنە جۇگىنۋ ءۇشىن كاسىپكەر مەن دەپارتامەنت قىزمەتكەرلەرى كەلىسىمشارتقا وتىرادى. سوعان سايكەس اگەنتتىك ماماندارى مەملەكەتتىك قىزمەتتەر مەن قۇقىقتىق-نورماتيۆتىك قىزمەتتەردى دەر كەزىندە الۋعا كومەك بەرەدى.
بۇگىندە شقو بويىنشا 24 بيزنەس سۋبەكتىسى شقو بويىنشا جەمقورلىقپەن كۇرەس دەپارتامەنتىمەن كەلىسىمشارتقا وتىرعان. ايتا كەتەيىك، فرونت كەڭسەمەن كەلىسىمگە قول قويعان كاسىپكەرلەر وسى كۇنگە دەيىن وبلىس بيۋدجەتىنە 145 ملرد تەڭگە كولەمىندە جالپى ينۆەستيسيا قۇيعان.
جوبا جۇزەگە اسىرىلعالى بەرى بيزنەس سالاسىندا وڭ وزگەرىستەر بايقالادى.
– ءبىزدىڭ كەڭسەنىڭ قىزمەتىنە "پروموتحود كازاحستان" ءجشس-نىڭ ديرەكتورى جۇگىندى. ايتۋىنشا، شقو تابيعي رەسۋرستار جانە تابيعات پايدالانۋدى رەتتەۋ باسقارماسى مەملەكەتتىك ەكولوگيالىق ساراپتامانىڭ قورتىندىسىن بەرۋدەن باس تارتىپتى. بۇدان سوڭ ءبىزدىڭ قىزمەتكەرلەر تەكسەرۋ جۇمىستارىن جۇرگىزىپ، ەكى جاقتى كەلىسىمگە كەلتىردى، – دەدى جىگەر بايديلدين.
ايتا كەتەيىك، وسى جوبا اياسىندا 18 كاسىپكەر مەن ينۆەستوردىڭ قۇقىعى قورعالدى. الداعى ۋاقىتتا وسى جۇمىستارى جالعاسىن تاپپاق.
