Aıtýly shara Almaty qalasynda ornalasqan Almaty oblystyq №15 mektep-ınternaty ǵımaratynda uıymdastyryldy. Shara barysynda birinshi bolyp Almaty qalalyq perınataldyq ortalyǵy qyzmetkerleri sý jańa medısınalyq jabdyqtyń sertıfıkatyna ıe boldy. «Shevron» kompanıasy ÓJJ SLE 5000 apparatyn, bes fototerapıa apparatyn jáne bes shprıs dozatoryn satyp alý úshin 25 650 000 teńge shyǵyndapty. Endi ókpeni jasandy jeldetý apparaty tynys alý joldary zaqymdanǵan balalardyń ómirin saqtaýǵa keńinen jol ashatyn bolady. Al shprıs dozatory naýqas adamǵa eritindilerdi, belsendiligi joǵary emdik dárilerdi, qorektik zattardy baqylap quıýǵa arnalǵan. Fototerapıa apparaty nárestelerdiń sary aýrýyn emdeýge arnalǵan.
Almaty qalasynyń perınataldyq ortalyǵy – Qazaqstandaǵy asa iri áıelder bosanatyn mekeme, ol júkti áıelderge, bosanatyn áıelderge jáne joǵary táýekel tobyndaǵy bosanatyn áıelderge joǵary bilikti akýsherlik-gınekologıalyq jáne neonatologıalyq kómek kórsetýge mamandandyrylǵan. Sondaı-aq, ortalyq aıy-kúninen buryn týǵan sábılerdi baǵyp-kútýge de baǵyttalǵanyn aıta ketýimiz kerek. Jyl saıyn Ortalyqta segiz myńǵa jýyq áıel bosanady, olardyń ishinde 15%-y – merziminen buryn bosanatyn áıelder.
Almaty qalalyq perınataldyq ortalyǵy dırektordyń neonataldyq qyzmet jónindegi orynbasary Naılá Haırýllına habarlaǵandaı, qazirgi ýaqytta Ortalyqtyń balalar bólimsheleri medısınalyq jabdyq tapshylyǵy baıqalýda. Máselen, mekemede nebári 10 ÓJJ apparaty (qajettilik – 18 apparat), 17 shprıs dozatory (qajettilik – 54), 3 fototerapıa shamy (qajettilik – 9) bar. «Shevron» kompanıasy syılaǵan jańa jabdyq ahýaldy barynsha jaqsartyp, dárigerlerge júzdegen balanyń ómirin qutqarýǵa múmkindik beredi.
Turmysy tómen otbasylardyń balalaryna arnalǵan Almaty oblystyq №15 mektep-ınternaty balalarynyń zaman talabany saı bilim men kásip alýyna múmkindik týyp otyr. Endi mektep-ınternattyń eki oqý sheberhanasy: temir sheberhanasy jáne shashtaraz bólmesi, sondaı-aq áleýmettik-turmystyq baǵdar (ÁTB) bólmesi tolyqqandy jumys istep, jetkinshekterdi jańa kásipke baýlıtyn bolady. Endi balalar oqyp jatqan mekemeden shyqpaı-aq, mamandyq alýǵa múmkindik alady. «Shevron» kompanıasynyń qoldaýymen bólmelerge qajetti jabdyq, múkámmal, jıhaz satyp alynǵanyn óz kózimizben kórdik. Bul jobany iske asyrýǵa 3 953 932 teńge jumsalypty.
Óz kezeginde Shevron kompanıasynyń ókili Leıla Aıtmuhanova:
– Qazaqstan jastarynyń kásiptik baǵdarlanýy kásipkerlik daǵdylardy ıgerýmen qatar kompanıanyń áleýmettik baǵdarlamalarynyń mańyzdy bóligi. Jastardyń áleýetin iske asyrý, bolashaq ekonomıkalyq derbestik pen pármendiliktiń ozyq úlgilerin kórsete bilý elimizdiń odan ári damýy úshin negizgi kórsetkishter bolyp tabylady dep esepteımiz, – dep oıyn ortaǵa saldy.
Áleýmettik-turmystyq baǵdar bólmelerinde ınternat tárbıelenýshileri tamaq isteý, ústelge ydys-aıaqty sáıkesinshe ornalastyrý, asúıdi jáne páterdi retke keltirý, zamanaýı turmystyq tehnıkany paıdalanýdy úırenedi. Mundaı daǵdylardy meńgerý balalardyń barynsha derbes bolýyna, ózine ózi qyzmet kórsetýine yqpal etedi.
Almaty oblystyq №15 mektep-ınternatynda ÁTB bólmesin ashqan kezde shef-aspazdan sheberlik dárisi, al shashtaraz óneri bólmesinde kásibı stılıs Laýra Túseevadan sheberlik dárisi ótti.
Mundaı qoldaýǵa aqyl-oıy kem balalarǵa arnalǵan №6 arnaıy mektep-ınternatynyń órenderi de ıe bolyp, bilim ordasynda qysh sheberhanasy ashyldy. «Shevron» kompanıasy bólgen qarajatqa bólmege tıisti jabdyq satyp alynǵan. Mekemede «qysh isi» pánin bilikti túrde úıretý úshin ustaz Sankt-Peterbýrg qalasyna oqýǵa baryp keldi. Jobanyń jalpy quny 2 685 916 teńgeni qurady.
Budan basqa, mektep-ınternatta búgingi kúnnen bastap gúl ósirý bólmesi paıda boldy. «AIaLA» qaıyrymdylyq qory stellaj, múkámmal, kitaptar, jıhaz jáne basqa da zattar satyp alǵan. Barlyǵy 941 691 teńge jumsaldy. Onyń demeýshisi de «Shevron» kompanıasy.
– Bul – bizdiń «Shevron» kompanıasymen tabysty túrde iske asyryp jatqan kezekti jobalarymyz. Bes jyl yntymaqtasa jumys isteý kezinde biz birlesip kúsh-jiger jumsaı otyryp, balalarǵa arnalǵan 75 bilim berý jáne medısınalyq mekemelerine kómektestik. Olardyń 28-i Almatyda, 1-ýi Astanada jáne 35-i Ereımentaýda ornalasqan. Bolashaqta ıgi isterimizdiń aýqymy turaqty túrde keńeıedi dep úmittenemiz, – dedi «AIaLA» qaıyrymdylyq qorynyń prezıdenti Aıdan Súleımenova. Shara barysynda sóz alǵan №15 Almaty oblystyq mektep-ınternatynyń dırektory Álıa Aqylbekova:
– Búginde bizdi tárbıelenýshilerimiz boıyndaǵy bula kúshin qajetti arnaǵa jumsaıtyn múmkindik týyp otyrǵanyna qýanyp otyrmyz. Balalar tamaq isteý, ózderin dastarqan basynda durys ustaý, ydys jýýdy úırenedi. Qyzdar óz ónerin shashtaraz bólmesi janynda jumys isteıtin «AIaLA» sulýlyq salonynda kórsete alady. Uldar temir sheberhanasyndaǵy jumyspen tanysady. Osylaısha, balalar bolashaqta adal eńbegimen nanyn taýyp jeıtin bolady, – dep atap ótti Álıa Aqylbekova.
«Shevron» kompanıasynyń jáne «AIaLA» qorynyń arqasynda bıyl bizdiń mekemede eńbektiń jańa túrleri paıda bolady, olar balalarǵa keıinnen jumysqa ornalasýǵa kómektesedi. Olar – gúl ósirý jáne qysh isi. Qol eńbeginiń tamasha terapıa ekeni belgili. Al balshyqpen jumys isteýdiń kómegimen jan jaıbaraqaty qalpyna keledi. Osyndaı eńbektiń daǵdylary bizdiń qamqorlyǵymyzdaǵy balalarǵa bolashaqta qajet bolatynyna senimimiz mol», – dep habarlady aqyl-oıy kem balalarǵa arnalǵan № 6 arnaıy (túzetý) mektep-ınternaty dırektorynyń oqý jumysy jónindegi orynbasary Svetlana Svoevolına.
Jıyn barysynda mektep-ınternat tárbıelenýshiler óz ónerlerin kórsetip, án aıtyp, bı bıledi.
Nurlan ÁÝBÁKİR
