ايتۋلى شارا الماتى قالاسىندا ورنالاسقان الماتى وبلىستىق №15 مەكتەپ-ينتەرناتى عيماراتىندا ۇيىمداستىرىلدى. شارا بارىسىندا ءبىرىنشى بولىپ الماتى قالالىق پەريناتالدىق ورتالىعى قىزمەتكەرلەرى سۋ جاڭا مەديسينالىق جابدىقتىڭ سەرتيفيكاتىنا يە بولدى. «شيەۆرون» كومپانياسى ءوجج SLE 5000 اپپاراتىن، بەس فوتوتەراپيا اپپاراتىن جانە بەس شپريس دوزاتورىن ساتىپ الۋ ءۇشىن 25 650 000 تەڭگە شىعىنداپتى. ەندى وكپەنى جاساندى جەلدەتۋ اپپاراتى تىنىس الۋ جولدارى زاقىمدانعان بالالاردىڭ ءومىرىن ساقتاۋعا كەڭىنەن جول اشاتىن بولادى. ال شپريس دوزاتورى ناۋقاس ادامعا ەرىتىندىلەردى، بەلسەندىلىگى جوعارى ەمدىك دارىلەردى، قورەكتىك زاتتاردى باقىلاپ قۇيۋعا ارنالعان. فوتوتەراپيا اپپاراتى نارەستەلەردىڭ سارى اۋرۋىن ەمدەۋگە ارنالعان.
الماتى قالاسىنىڭ پەريناتالدىق ورتالىعى – قازاقستانداعى اسا ءىرى ايەلدەر بوساناتىن مەكەمە، ول جۇكتى ايەلدەرگە، بوساناتىن ايەلدەرگە جانە جوعارى تاۋەكەل توبىنداعى بوساناتىن ايەلدەرگە جوعارى بىلىكتى اكۋشەرلىك-گينەكولوگيالىق جانە نەوناتولوگيالىق كومەك كورسەتۋگە مامانداندىرىلعان. سونداي-اق، ورتالىق ايى-كۇنىنەن بۇرىن تۋعان سابيلەردى باعىپ-كۇتۋگە دە باعىتتالعانىن ايتا كەتۋىمىز كەرەك. جىل سايىن ورتالىقتا سەگىز مىڭعا جۋىق ايەل بوسانادى، ولاردىڭ ىشىندە 15%-ى – مەرزىمىنەن بۇرىن بوساناتىن ايەلدەر.
الماتى قالالىق پەريناتالدىق ورتالىعى ديرەكتوردىڭ نەوناتالدىق قىزمەت جونىندەگى ورىنباسارى نايليا حايرۋللينا حابارلاعانداي، قازىرگى ۋاقىتتا ورتالىقتىڭ بالالار بولىمشەلەرى مەديسينالىق جابدىق تاپشىلىعى بايقالۋدا. ماسەلەن، مەكەمەدە نەبارى 10 ءوجج اپپاراتى (قاجەتتىلىك – 18 اپپارات)، 17 شپريس دوزاتورى (قاجەتتىلىك – 54)، 3 فوتوتەراپيا شامى (قاجەتتىلىك – 9) بار. «شيەۆرون» كومپانياسى سىيلاعان جاڭا جابدىق احۋالدى بارىنشا جاقسارتىپ، دارىگەرلەرگە جۇزدەگەن بالانىڭ ءومىرىن قۇتقارۋعا مۇمكىندىك بەرەدى.
تۇرمىسى تومەن وتباسىلاردىڭ بالالارىنا ارنالعان الماتى وبلىستىق №15 مەكتەپ-ينتەرناتى بالالارىنىڭ زامان تالابانى ساي ءبىلىم مەن كاسىپ الۋىنا مۇمكىندىك تۋىپ وتىر. ەندى مەكتەپ-ينتەرناتتىڭ ەكى وقۋ شەبەرحاناسى: تەمىر شەبەرحاناسى جانە شاشتاراز بولمەسى، سونداي-اق الەۋمەتتىك-تۇرمىستىق باعدار (ءاتب) بولمەسى تولىققاندى جۇمىس ىستەپ، جەتكىنشەكتەردى جاڭا كاسىپكە باۋليتىن بولادى. ەندى بالالار وقىپ جاتقان مەكەمەدەن شىقپاي-اق، ماماندىق الۋعا مۇمكىندىك الادى. «شيەۆرون» كومپانياسىنىڭ قولداۋىمەن بولمەلەرگە قاجەتتى جابدىق، مۇكاممال، جيھاز ساتىپ الىنعانىن ءوز كوزىمىزبەن كوردىك. بۇل جوبانى ىسكە اسىرۋعا 3 953 932 تەڭگە جۇمسالىپتى.
ءوز كەزەگىندە شيەۆرون كومپانياسىنىڭ وكىلى لەيلا ايتمۇحانوۆا:
– قازاقستان جاستارىنىڭ كاسىپتىك باعدارلانۋى كاسىپكەرلىك داعدىلاردى يگەرۋمەن قاتار كومپانيانىڭ الەۋمەتتىك باعدارلامالارىنىڭ ماڭىزدى بولىگى. جاستاردىڭ الەۋەتىن ىسكە اسىرۋ، بولاشاق ەكونوميكالىق دەربەستىك پەن پارمەندىلىكتىڭ وزىق ۇلگىلەرىن كورسەتە ءبىلۋ ەلىمىزدىڭ ودان ءارى دامۋى ءۇشىن نەگىزگى كورسەتكىشتەر بولىپ تابىلادى دەپ ەسەپتەيمىز، – دەپ ويىن ورتاعا سالدى.
الەۋمەتتىك-تۇرمىستىق باعدار بولمەلەرىندە ينتەرنات تاربيەلەنۋشىلەرى تاماق ىستەۋ، ۇستەلگە ىدىس-اياقتى سايكەسىنشە ورنالاستىرۋ، ءاسۇيدى جانە پاتەردى رەتكە كەلتىرۋ، زاماناۋي تۇرمىستىق تەحنيكانى پايدالانۋدى ۇيرەنەدى. مۇنداي داعدىلاردى مەڭگەرۋ بالالاردىڭ بارىنشا دەربەس بولۋىنا، وزىنە ءوزى قىزمەت كورسەتۋىنە ىقپال ەتەدى.
الماتى وبلىستىق №15 مەكتەپ-ينتەرناتىندا ءاتب بولمەسىن اشقان كەزدە شەف-اسپازدان شەبەرلىك ءدارىسى، ال شاشتاراز ونەرى بولمەسىندە كاسىبي ستيليست لاۋرا تۇسەيەۆادان شەبەرلىك ءدارىسى ءوتتى.
مۇنداي قولداۋعا اقىل-ويى كەم بالالارعا ارنالعان №6 ارنايى مەكتەپ-ينتەرناتىنىڭ ورەندەرى دە يە بولىپ، ءبىلىم ورداسىندا قىش شەبەرحاناسى اشىلدى. «شيەۆرون» كومپانياسى بولگەن قاراجاتقا بولمەگە ءتيىستى جابدىق ساتىپ الىنعان. مەكەمەدە «قىش ءىسى» ءپانىن بىلىكتى تۇردە ۇيرەتۋ ءۇشىن ۇستاز سانكت-پەتەربۋرگ قالاسىنا وقۋعا بارىپ كەلدى. جوبانىڭ جالپى قۇنى 2 685 916 تەڭگەنى قۇرادى.
بۇدان باسقا، مەكتەپ-ينتەرناتتا بۇگىنگى كۇننەن باستاپ گۇل ءوسىرۋ بولمەسى پايدا بولدى. «ايالا» قايىرىمدىلىق قورى ستەللاج، مۇكاممال، كىتاپتار، جيھاز جانە باسقا دا زاتتار ساتىپ العان. بارلىعى 941 691 تەڭگە جۇمسالدى. ونىڭ دەمەۋشىسى دە «شيەۆرون» كومپانياسى.
– بۇل – ءبىزدىڭ «شيەۆرون» كومپانياسىمەن تابىستى تۇردە ىسكە اسىرىپ جاتقان كەزەكتى جوبالارىمىز. بەس جىل ىنتىماقتاسا جۇمىس ىستەۋ كەزىندە ءبىز بىرلەسىپ كۇش-جىگەر جۇمساي وتىرىپ، بالالارعا ارنالعان 75 ءبىلىم بەرۋ جانە مەديسينالىق مەكەمەلەرىنە كومەكتەستىك. ولاردىڭ 28ء-ى الماتىدا، 1ء-ۋى استانادا جانە 35ء-ى ەرەيمەنتاۋدا ورنالاسقان. بولاشاقتا يگى ىستەرىمىزدىڭ اۋقىمى تۇراقتى تۇردە كەڭەيەدى دەپ ۇمىتتەنەمىز، – دەدى «ايالا» قايىرىمدىلىق قورىنىڭ پرەزيدەنتى ايدان سۇلەيمەنوۆا. شارا بارىسىندا ءسوز العان №15 الماتى وبلىستىق مەكتەپ-ينتەرناتىنىڭ ديرەكتورى ءاليا اقىلبەكوۆا:
– بۇگىندە ءبىزدى تاربيەلەنۋشىلەرىمىز بويىنداعى بۇلا كۇشىن قاجەتتى ارناعا جۇمسايتىن مۇمكىندىك تۋىپ وتىرعانىنا قۋانىپ وتىرمىز. بالالار تاماق ىستەۋ، وزدەرىن داستارقان باسىندا دۇرىس ۇستاۋ، ىدىس جۋۋدى ۇيرەنەدى. قىزدار ءوز ونەرىن شاشتاراز بولمەسى جانىندا جۇمىس ىستەيتىن «ايالا» سۇلۋلىق سالونىندا كورسەتە الادى. ۇلدار تەمىر شەبەرحاناسىنداعى جۇمىسپەن تانىسادى. وسىلايشا، بالالار بولاشاقتا ادال ەڭبەگىمەن نانىن تاۋىپ جەيتىن بولادى، – دەپ اتاپ ءوتتى ءاليا اقىلبەكوۆا.
«شيەۆرون» كومپانياسىنىڭ جانە «ايالا» قورىنىڭ ارقاسىندا بيىل ءبىزدىڭ مەكەمەدە ەڭبەكتىڭ جاڭا تۇرلەرى پايدا بولادى، ولار بالالارعا كەيىننەن جۇمىسقا ورنالاسۋعا كومەكتەسەدى. ولار – گۇل ءوسىرۋ جانە قىش ءىسى. قول ەڭبەگىنىڭ تاماشا تەراپيا ەكەنى بەلگىلى. ال بالشىقپەن جۇمىس ىستەۋدىڭ كومەگىمەن جان جايباراقاتى قالپىنا كەلەدى. وسىنداي ەڭبەكتىڭ داعدىلارى ءبىزدىڭ قامقورلىعىمىزداعى بالالارعا بولاشاقتا قاجەت بولاتىنىنا سەنىمىمىز مول»، – دەپ حابارلادى اقىل-ويى كەم بالالارعا ارنالعان № 6 ارنايى (تۇزەتۋ) مەكتەپ-ينتەرناتى ديرەكتورىنىڭ وقۋ جۇمىسى جونىندەگى ورىنباسارى سۆەتلانا سۆويەۆولينا.
جيىن بارىسىندا مەكتەپ-ينتەرنات تاربيەلەنۋشىلەر ءوز ونەرلەرىن كورسەتىپ، ءان ايتىپ، بي بيلەدى.
نۇرلان اۋباكىر
