Qazaqstan Bas prokýratýrasy Dina Smailovaǵa (kópshilikke Dina Tańsári atymen tanymal) qatysty ekstraditsiia máselesi boiynsha Chernogoriia biliginiń sheshimin kútip otyr. Bul týraly Májilis kýlýarynda Bas prokýrordyń orynbasary Áset Shyndaliev aitty, dep habarlaidy Dalanews.kz.
«Dina Tańsári Chernogoriiada jasyrynyp júr. Oǵan izdeý jariialandy, materialdar joldandy. Meniń bilýimshe, chernogorlyq tarap bul máseleni qarady, sheshim qabyldady, endi ári qarai qalai bolaryn kóremiz», – dedi Shyndaliev.
Buǵan deiin Qazaqstannyń Adam quqyqtary jáne zańdylyqty saqtaý jónindegi halyqaralyq biýrosy Chernogoriia astanasy Podgoritsada Qazaqstan Bas prokýratýrasynyń «NeMolchi.kz» qorynyń jetekshisin ekstraditsiialaý týraly suraýy boiynsha alǵashqy sot tyńdaýy ótkenin málimdegen bolatyn.
Uiymnyń aqparaty boiynsha, Chernogoriia prokýratýrasy ekstraditsiiaǵa qarsy shyqqan. Sonymen qatar, 2024 jyldyń shildesinde Chernogoriia biligi Smailovaǵa saiasi bosqyn mártebesin berý týraly sheshim qabyldaýy tiis.
Smailova 2021 jyldan beri Qazaqstannan tys jerde turyp keledi. 2023 jyldyń jeltoqsan aiynyń sońynda oǵan halyqaralyq izdeý jariialanǵan. Quqyq qorǵaý organdary ony zańsyz aqsha jinady jáne jinalǵan qarajatty málimdelgen maqsattardan bólek baǵyttarǵa jumsady dep kúdiktenedi.
2024 jyldyń 14 sáýirinde Smailova Chernogoriiada ustalǵany týraly habarlaǵan bolatyn.
