قازاقستان باس پروكۋراتۋراسى دينا سمايلوۆاعا (كوپشىلىككە دينا ءتاڭسارى اتىمەن تانىمال) قاتىستى ەكستراديسيا ماسەلەسى بويىنشا چەرنوگوريا بيلىگىنىڭ شەشىمىن كۇتىپ وتىر. بۇل تۋرالى ءماجىلىس كۋلۋارىندا باس پروكۋروردىڭ ورىنباسارى اسەت شىندالييەۆ ايتتى، دەپ حابارلايدى Dalanews.kz.
«دينا ءتاڭسارى چەرنوگوريادا جاسىرىنىپ ءجۇر. وعان ىزدەۋ جاريالاندى، ماتەريالدار جولداندى. مەنىڭ بىلۋىمشە، چەرنوگورلىق تاراپ بۇل ماسەلەنى قارادى، شەشىم قابىلدادى، ەندى ءارى قاراي قالاي بولارىن كورەمىز»، – دەدى شىندالييەۆ.
بۇعان دەيىن قازاقستاننىڭ ادام قۇقىقتارى جانە زاڭدىلىقتى ساقتاۋ جونىندەگى حالىقارالىق بيۋروسى چەرنوگوريا استاناسى پودگوريسادا قازاقستان باس پروكۋراتۋراسىنىڭ «نەمولچي.kz» قورىنىڭ جەتەكشىسىن ەكستراديسيالاۋ تۋرالى سۇراۋى بويىنشا العاشقى سوت تىڭداۋى وتكەنىن مالىمدەگەن بولاتىن.
ۇيىمنىڭ اقپاراتى بويىنشا، چەرنوگوريا پروكۋراتۋراسى ەكستراديسياعا قارسى شىققان. سونىمەن قاتار، 2024 جىلدىڭ شىلدەسىندە چەرنوگوريا بيلىگى سمايلوۆاعا ساياسي بوسقىن مارتەبەسىن بەرۋ تۋرالى شەشىم قابىلداۋى ءتيىس.
سمايلوۆا 2021 جىلدان بەرى قازاقستاننان تىس جەردە تۇرىپ كەلەدى. 2023 جىلدىڭ جەلتوقسان ايىنىڭ سوڭىندا وعان حالىقارالىق ىزدەۋ جاريالانعان. قۇقىق قورعاۋ ورگاندارى ونى زاڭسىز اقشا جينادى جانە جينالعان قاراجاتتى مالىمدەلگەن ماقساتتاردان بولەك باعىتتارعا جۇمسادى دەپ كۇدىكتەنەدى.
2024 جىلدىڭ 14 ساۋىرىندە سمايلوۆا چەرنوگوريادا ۇستالعانى تۋرالى حابارلاعان بولاتىن.
