Qyrǵyzstan prezidenti Sadyr Japarov Qamshybek Táshievti qyzmetinen bosatý sheshimine taǵy da túsinikteme berdi. Ol bul týraly "Kabar" agenttigine bergen suhbatynda aitty, dep habarlaidy Dalanews.kz.
Qyrǵyzstan prezidentiniń sózinshe, MUQK tóraǵasyn qyzmetten bosatý týraly sheshim qabyldar aldynda ol Qamshybek Táshievpen telefon arqyly sóilesip, eldegi jaǵdaidy túsindirip, qyzmetten bosatatynyn aldyn ala habarlaǵan. Sodan keiin ǵana resmi sheshim qabyldanǵan.
Sadyr Japarovtyń aitýynsha, bul qadam kerisinshe dosyn saqtap qalý úshin jasalǵan.
"Onyń janyndaǵy keibir adamdar Táshievtiń atyn jamylyp, Parlament depýtattary men memlekettik qyzmetkerlerge, qoǵamdaǵy bedeldi tulǵalarǵa "general jaǵyna ótińder" degen usynystar aitqan", - dedi ol.
Qyrǵyzstan prezidenti mundai áreketter jalǵasa berse, memlekettik apparat ishinde jáne qoǵamda jikke bóliný qaýpi týyndaitynyn jetkizdi.
Sondyqtan memlekettegi turaqtylyqty bárinen joǵary qoiatynyn aityp, Qamshybek Táshievti qyzmetten bosatý týraly sheshim qabyldaýǵa májbúr bolǵanyn málimdedi.
Aita keteiik, 10 aqpanda Qyrǵyzstannyń Ministrler kabineti tóraǵasynyń orynbasary – Memlekettik ulttyq qaýipsizdik komitetiniń tóraǵasy Qamshybek Táshiev qyzmetinen bosatyldy.
