Qazaqstannyń Joǵarǵy soty sheshen belsendisi Mansýr Movlaevty Reseige ekstraditsiialaý týraly sheshimniń oryndalýyn ýaqytsha toqtatty. Bul týraly onyń advokaty Mýrat Adam málimdedi, dep habarlaidy Dalanews.kz.
Advokattyń aitýynsha, ekstraditsiia Movlaevtyń ózine bosqyn mártebesin berýden bas tartýdy zańsyz dep taný jónindegi talabyn sot qarap shyqqanǵa deiin toqtatylǵan.
Buǵan deiin Qazaqstan biligi Movlaevqa bosqyn mártebesin berýden bas tartqan. Osydan keiin Bas prokýratýra ony Reseige berý týraly ekstraditsiialyq suraýdy qanaǵattandyrý jóninde sheshim qabyldaǵan.
Aita keteiik, jýyrda BUU-nyń Adam quqyqtary jónindegi komiteti de Movlaevtyń shaǵymyn tirkep, Qazaqstandy is máni boiynsha qaralǵanǵa deiin ony Reseige bermeýge shaqyrǵan.
Mansýr Movlaev 1995 jylǵy 12 jeltoqsanda dúniege kelgen. Ol óz elinde oppozitsiialyq qozǵalysqa qatysyp, Sheshenstandaǵy qýǵyn-súrgin men iz-túzsiz joǵalǵandar týraly málimetter jinaǵan. Buǵan deiin Movlaev esirtkige bailanysty qoldan jasalǵan is boiynsha eki jyl túrmede otyrǵanyn málimdegen. Keiin ol Qyrǵyzstanǵa qashyp, sodan keiin Qazaqstanǵa ótken.
Advokattarynyń aitýynsha, Movlaev Sheshenstan túrmesinde azaptalǵan. Osyny anyqtaý úshin olar Ystambul hattamasyna sáikes, psiholog mamandy tartqan.
"2022 jyly qorǵaýymyzdaǵy azamatqa azaptaý qoldanylǵan. Árine, bizde bul jaǵdaidyń bolǵanyn rastaityn naqty dálelder joq. Mansýr solai deidi – biz, advokattar, oǵan senemiz. Biraq litsenziialanǵan psiholog maman ony qarap, bul jaǵdaidyń shyn bolǵan-bolmaǵanyn anyqtap kórse deimiz. Bul azaptaýǵa qatysty ádettegi jumys. Mundai dálelderge baǵany sot beredi. Bizdiń maqsat – osy zertteýdi alý. Sebebi bul materialdy Movlaevqa bosqyn mártebesin berý týraly sheshim qabyldanatyn komissiiada jáne halyqaralyq organdarǵa júginýde paidalanǵymyz keledi", – dedi advokat Rena Kerimova.
Alaida mamanǵa Almaty ýaqytsha ustaý izoliatorynda Movlaevpen kezdesý múmkindigi berilmegen.
