Bas prokýrordyń orynbasary Ǵalymjan Qoigeldiev Talǵar oqiǵasyna qatysty júrip jatqan tergeý týraly sońǵy málimetterdi bólisti, - dep habarlaidy Dalanews.kz.
Onyń sózinshe, tergeý barysy Bas prokýratýranyń baqylaýynda. Qoigeldiev kúdiktiler ustalyp, aiyp taǵylǵanyn atap ótti.
"15 qazanda Ishki ister ministriniń birinshi orynbasary jáne Almaty oblysynyń prokýrory brifing ótkizdi. Sol jerde tergeý barysy tolyq aityldy. Sherzattyń ákesine qatysty eshqandai qylmystyq is qozǵalǵan joq. Úidiń órtenýine qatysty da tergeý júrip jatyr. Saraptama taǵaiyndaldy", - deidi bas prokýrordyń orynbasary.
Eske salaiyq, áleýmettik jelide Sherzattyń otbasyna qatysty birqatar daýly aqparat taraýda. Sonyń ishinde qaiǵyly oqiǵa bolar aldyndaǵy video da bar.
Videodan sýyqty qarýdy tek Sherzattyń ákesiniń qolynan kórýge bolady. Qysqasha aitqanda, video mazmuny atyshýly "Nursultannyń bulbuly" telegram arnasynda aitylǵandai, atalǵan oqiǵa turmystyq janjaldan shyqqan jáne ony birinshi bolyp qaitys bolǵan jasóspirimniń ákesi men ózi qozǵaǵan degenge saiady.
Bul jaǵdailarǵa esh tań qalmaitynyn aitqan Sherzattyń ákesi Qazaqstanda ádil sheshim shyǵatynyna kúmánmen qaraitynyn, sondyqtan Prezidentten, Ishki ister ministrinen otbasyn Almaty qalasynan, Almaty oblysynan aman-esen alyp shyǵýǵa qoldaý bildirýdi suraidy.
"Men aqtalaiyn dep turǵanym joq. Qorqyp ta turǵanym joq. Óitkeni men eshkimdi óltirgen joqpyn, meniń tarapymnan qan shyqpady. Shyny kerek, qaiǵy-qasiretten sharshadym. Men tek ádil sot bolǵanyn qalaimyn. Kinám bolsa, meni kinálasyn. Baýyrymnyń kinási bolsa, ony da kinálasyn. Biraq, meniń bir talabym - balamdy óltirgen adamdar ádil jazasyn alsyn!", - deidi ol Tik-tokta Prezident myrzaǵa joldaǵan sońǵy úndeý videosynda.
Qaraly áke ózin qaralap jatqanyna bek senimdi.
"Meniń balamnyń jaraqattaryn da jasyrmaqshy boldy. Sondyqtan men eshteńege tań qalmaimyn qazir. Sondyqtan mitingi degen nárseniń keregi joq. Meni, meniń otbasymdy qaralaýdyń qajeti joq. Eger meniń balamdy óltirgen adamdardyń ákeleri er-azamat bolsa, meniń aldyma keler edi. Tik-tokqa, instagramǵa úlken kisilerdi shyǵaryp qoiyp, úige áiel adamdardy jiberip qoiyp, qarap otyrmas edi. Sonda mundai dúrbeleńge barmaityn edik. Meniń Prezidentten, Ishki ister ministrinen suraitynym, otbasyma tynyshtyq berýin jáne otbasymdy Almaty qalasynan, Almaty oblysynan aman-esen alyp shyǵyp ketýime qoldaý bildirse".
Sondai-aq ol sottyń sozylatyny aidan anyq ekenin aitady. Qolyndaǵy pyshaqqa da qatysty óz oiyn aitty.
Men qorqyp-úrkip turǵanym joq. Olar pyshaqpen keldi, men endi qalam, qaǵaz ustap shyqpaimyn ǵoi ondaida. Olardan jalbarynyp-jalynyp suradym. Sol arada qoldaryn erkekshe berip ketti. "Boldy" dep. Artynan kelip istep otyrǵan tirlikteri anaý. Men, Sherzat, Nurqanat qana boldy bizden. Biz qan tóksek, jaraidy, aiyptap, qaralasańyzdar bolady. "Qan tókti bular, qan isher" dep. Men qan tókkenim joq, qan tókpeimin de", - deidi ol.
Onyń oiynsha, munyń barlyǵy óziniń shyndyqty aityp qoiǵanynan bolyp jatyr.
