باس پروكۋروردىڭ ورىنباسارى عالىمجان قويگەلدييەۆ تالعار وقيعاسىنا قاتىستى ءجۇرىپ جاتقان تەرگەۋ تۋرالى سوڭعى مالىمەتتەردى ءبولىستى، - دەپ حابارلايدى Dalanews.kz.
ونىڭ سوزىنشە، تەرگەۋ بارىسى باس پروكۋراتۋرانىڭ باقىلاۋىندا. قويگەلدييەۆ كۇدىكتىلەر ۇستالىپ، ايىپ تاعىلعانىن اتاپ ءوتتى.
"15 قازاندا ىشكى ىستەر ءمينيسترىنىڭ ءبىرىنشى ورىنباسارى جانە الماتى وبلىسىنىڭ پروكۋرورى بريفينگ وتكىزدى. سول جەردە تەرگەۋ بارىسى تولىق ايتىلدى. شەرزاتتىڭ اكەسىنە قاتىستى ەشقانداي قىلمىستىق ءىس قوزعالعان جوق. ءۇيدىڭ ورتەنۋىنە قاتىستى دا تەرگەۋ ءجۇرىپ جاتىر. ساراپتاما تاعايىندالدى"، - دەيدى باس پروكۋروردىڭ ورىنباسارى.
ەسكە سالايىق، الەۋمەتتىك جەلىدە شەرزاتتىڭ وتباسىنا قاتىستى ءبىرقاتار داۋلى اقپارات تاراۋدا. سونىڭ ىشىندە قايعىلى وقيعا بولار الدىنداعى ۆيدەو دا بار.
ۆيدەودان سۋىقتى قارۋدى تەك شەرزاتتىڭ اكەسىنىڭ قولىنان كورۋگە بولادى. قىسقاشا ايتقاندا، ۆيدەو مازمۇنى اتىشۋلى "نۇرسۇلتاننىڭ بۇلب ۇلى" تەلەگرام ارناسىندا ايتىلعانداي، اتالعان وقيعا تۇرمىستىق جانجالدان شىققان جانە ونى ءبىرىنشى بولىپ قايتىس بولعان ءجاسوسپىرىمنىڭ اكەسى مەن ءوزى قوزعاعان دەگەنگە سايادى.
بۇل جاعدايلارعا ەش تاڭ قالمايتىنىن ايتقان شەرزاتتىڭ اكەسى قازاقستاندا ءادىل شەشىم شىعاتىنىنا كۇمانمەن قارايتىنىن، سوندىقتان پرەزيدەنتتەن، ىشكى ىستەر مينيسترىنەن وتباسىن الماتى قالاسىنان، الماتى وبلىسىنان امان-ەسەن الىپ شىعۋعا قولداۋ ءبىلدىرۋدى سۇرايدى.
"مەن اقتالايىن دەپ تۇرعانىم جوق. قورقىپ تا تۇرعانىم جوق. ويتكەنى مەن ەشكىمدى ولتىرگەن جوقپىن، مەنىڭ تاراپىمنان قان شىقپادى. شىنى كەرەك، قايعى-قاسىرەتتەن شارشادىم. مەن تەك ءادىل سوت بولعانىن قالايمىن. كىنام بولسا، مەنى كىنالاسىن. باۋىرىمنىڭ كىناسى بولسا، ونى دا كىنالاسىن. ءبىراق، مەنىڭ ءبىر تالابىم - بالامدى ولتىرگەن ادامدار ءادىل جازاسىن السىن!"، - دەيدى ول تيك-توكتا پرەزيدەنت مىرزاعا جولداعان سوڭعى ۇندەۋ ۆيدەوسىندا.
قارالى اكە ءوزىن قارالاپ جاتقانىنا بەك سەنىمدى.
"مەنىڭ بالامنىڭ جاراقاتتارىن دا جاسىرماقشى بولدى. سوندىقتان مەن ەشتەڭەگە تاڭ قالمايمىن ءقازىر. سوندىقتان ميتينگى دەگەن نارسەنىڭ كەرەگى جوق. مەنى، مەنىڭ وتباسىمدى قارالاۋدىڭ قاجەتى جوق. ەگەر مەنىڭ بالامدى ولتىرگەن ادامداردىڭ اكەلەرى ەر-ازامات بولسا، مەنىڭ الدىما كەلەر ەدى. تيك-توكقا، ينستاگرامعا ۇلكەن كىسىلەردى شىعارىپ قويىپ، ۇيگە ايەل ادامداردى جىبەرىپ قويىپ، قاراپ وتىرماس ەدى. سوندا مۇنداي دۇربەلەڭگە بارمايتىن ەدىك. مەنىڭ پرەزيدەنتتەن، ىشكى ىستەر مينيسترىنەن سۇرايتىنىم، وتباسىما تىنىشتىق بەرۋىن جانە وتباسىمدى الماتى قالاسىنان، الماتى وبلىسىنان امان-ەسەن الىپ شىعىپ كەتۋىمە قولداۋ بىلدىرسە".
سونداي-اق ول سوتتىڭ سوزىلاتىنى ايدان انىق ەكەنىن ايتادى. قولىنداعى پىشاققا دا قاتىستى ءوز ويىن ايتتى.
مەن قورقىپ-ۇركىپ تۇرعانىم جوق. ولار پىشاقپەن كەلدى، مەن ەندى قالام، قاعاز ۇستاپ شىقپايمىن عوي وندايدا. ولاردان جالبارىنىپ-جالىنىپ سۇرادىم. سول ارادا قولدارىن ەركەكشە بەرىپ كەتتى. "بولدى" دەپ. ارتىنان كەلىپ ىستەپ وتىرعان تىرلىكتەرى اناۋ. مەن، شەرزات، نۇرقانات قانا بولدى بىزدەن. ءبىز قان توكسەك، جارايدى، ايىپتاپ، قارالاساڭىزدار بولادى. "قان توكتى بۇلار، قان ىشەر" دەپ. مەن قان توككەنىم جوق، قان توكپەيمىن دە"، - دەيدى ول.
ونىڭ ويىنشا، مۇنىڭ بارلىعى ءوزىنىڭ شىندىقتى ايتىپ قويعانىنان بولىپ جاتىر.
