Sherzat Polattyń ólimine qatysty is boiynsha qorǵanýǵa quqyǵy bar kýá retinde tanylǵan Elmira Nurbekova advokat Djohar Ýtebekovtiń ústinen shaǵym túsirdi, dep habarlaidy Dalanews.kz.
Advokat Djohar Ýtebekovtiń aitýynsha, ol Sherzat Polat isi boiynsha ótkir pikir bildirip júrgeni úshin ústinen shaǵym túsken. Shaǵym Almaty qalalyq advokattar alqasyna joldanǵan.
– Men shaǵymnyń politsiia qyzmetkeriniń nusqaýymen jazylǵanyn ańǵardym. Sebebi mátin politsiia jargony men «óz qolymmen jazyldy» degen siiaqty quqyqtyq terminderge toly. Eń qyzyǵy – Nurbekova hanym politsiiany, prokýratýra men sotty qorǵaidy. Ol meni quqyq qorǵaý organdaryna qysym kórsetip, jalǵan aqparat taratyp jatyr dep esepteidi. Biraq onyń ne sebepti solardyń advokatyna ainalǵany túsiniksiz. Menińshe, ony bul iske bireýler paidalanyp otyr. Áitpese, óz betimen mundai qadamǵa bara qoiatyn adam emes, – dedi Djohar Ýtebekov «Giperborei» YouTube arnasyna bergen suhbatynda.
Elmira Nurbekova byltyr Talǵardaǵy jappai tóbeles kezinde qylmystyq iske qatysy bar degen toǵyz adammen birge oqiǵa ornynda bolǵan. Keiinnen kýáger retinde tanylyp, jaýap alynǵan. Ol kezde ózin shok jaǵdaiynda bolǵanyn aitqan. Alaida sotta kórsetilgen beinejazbada onyń oqiǵa týraly kúlip aityp otyrǵany baiqalǵan. Osyǵan bailanysty prokýror Dana Sársenbai sottan Elmira Nurbekova men taǵy bir kýáger Dana Jaqsygeldige qatysty jeke qaýly shyǵaryp, qosymsha tergeý júrgizýdi suraǵan.
5 maýsym kúni úkim oqyǵan sot prokýrordyń bul ótinishin qanaǵattandyrdy. Is boiynsha basty aiyptalýshy Abzal Shynasyl 23 jylǵa, Ravil Sákiev 20 jylǵa, Azamat Toqtaýbaev 15 jylǵa, Nurqiias Iliiasov 9 jylǵa bas bostandyǵynan aiyryldy. Al qalǵan aiyptalýshylar – Shyńǵys Belǵojaev, Darhan Áskentai, Nurbol Toqtaýbaev jáne Didar Qaliahmet 7 jylǵa sottaldy. Kámeletke tolmaǵan Dýman Ysqaqqa 1,5 jyl jaza kesildi.
