Almaty qalasynyń Bostandyq aýdandyq soty Qazaqstan Respýblikasy Ádilet ministrliginiń talap aryzy boiynsha advokat Adam Muratty advokattyq qyzmetpen ainalysý quqyǵynan aiyrý týraly sheshim shyǵardy, dep habarlaidy Dalanews.kz.
Azamattyq is «Advokattyq qyzmet jáne zań kómegi týraly» zańnyń 44-baby negizinde qaraldy. Atalǵan normaǵa sáikes, advokat kásibi mindetterin oryndaý kezinde zań talaptaryn, zań kómegin kórsetý qaǵidattaryn nemese advokattardyń kásibi ádep kodeksin óreskel ne birneshe ret buzǵan jaǵdaida, litsenziia sot tártibimen qaitaryp alynýy múmkin.
Sotqa júginýge Ádilet ministrliginiń advokattyq qyzmet salasyndaǵy ýákiletti organ retinde bergen talap aryzy negiz boldy. Talap qoiýshy tarap advokat Adam Murattyń kásibi qyzmetin júzege asyrý barysynda qoldanystaǵy zańnama normalaryn birneshe ret jáne óreskel túrde buzǵanyn kórsetti.
Is materialdaryna sáikes, advokat áleýmettik jelilerde óz quqyqtarynyń buzylǵany, sondai-aq tergeý jáne sot organdarynyń zańsyz áreketteri týraly málimdemeler jariialap, shyndyqqa janaspaityn aqparat taratqan. Sot bul derekterdiń jalǵan ekenin, al tergeý organdary qyzmetiniń zańdylyǵyn rastaityn sot aktileri bar ekenin anyqtady.
Soǵan qaramastan, advokat pen onyń qorǵaýyndaǵy tulǵalardyń quqyqtary buzyldy degen mazmundaǵy aqparat qoǵamǵa taratylǵan. Talap qoiýshy taraptyń ýájinshe, azaptaý faktileri jóninde negizsiz jariia málimdemeler jasaý, sot júiesiniń bedelin túsiretin pikirler bildirý advokat mártebesin teris paidalaný bolyp tabylady jáne tergeý organdaryna qysym kórsetý maqsatynda qoldanylǵan.
Ádilet ministrligi mundai áreketterdiń júieli ári jariia sipatta bolǵanyn, olardyń ádil sot pen advokatýra institýtynyń bedeline nuqsan keltiretinin atap ótti. Bul mán-jailar advokatty litsenziiadan aiyrý týraly talap qoiýǵa negiz bolǵan.
Sot taraptardyń dálelderin, is materialdaryn jan-jaqty zerdelei kele, talap aryzdy qanaǵattandyrý týraly sheshim qabyldady. Nátijesinde advokat Adam Murat advokattyq qyzmetpen ainalysý quqyǵynan aiyryldy.
