الماتى قالاسىنىڭ بوستاندىق اۋداندىق سوتى قازاقستان رەسپۋبليكاسى ادىلەت مينيسترلىگىنىڭ تالاپ ارىزى بويىنشا ادۆوكات ادام مۇراتتى ادۆوكاتتىق قىزمەتپەن اينالىسۋ قۇقىعىنان ايىرۋ تۋرالى شەشىم شىعاردى، دەپ حابارلايدى Dalanews.kz.
ازاماتتىق ءىس «ادۆوكاتتىق قىزمەت جانە زاڭ كومەگى تۋرالى» زاڭنىڭ 44-بابى نەگىزىندە قارالدى. اتالعان نورماعا سايكەس، ادۆوكات كاسىبي مىندەتتەرىن ورىنداۋ كەزىندە زاڭ تالاپتارىن، زاڭ كومەگىن كورسەتۋ قاعيداتتارىن نەمەسە ادۆوكاتتاردىڭ كاسىبي ادەپ كودەكسىن ورەسكەل نە بىرنەشە رەت بۇزعان جاعدايدا، ليسەنزيا سوت تارتىبىمەن قايتارىپ الىنۋى مۇمكىن.
سوتقا جۇگىنۋگە ادىلەت مينيسترلىگىنىڭ ادۆوكاتتىق قىزمەت سالاسىنداعى ۋاكىلەتتى ورگان رەتىندە بەرگەن تالاپ ارىزى نەگىز بولدى. تالاپ قويۋشى تاراپ ادۆوكات ادام مۇراتتىڭ كاسىبي قىزمەتىن جۇزەگە اسىرۋ بارىسىندا قولدانىستاعى زاڭناما نورمالارىن بىرنەشە رەت جانە ورەسكەل تۇردە بۇزعانىن كورسەتتى.
ءىس ماتەريالدارىنا سايكەس، ادۆوكات الەۋمەتتىك جەلىلەردە ءوز قۇقىقتارىنىڭ بۇزىلعانى، سونداي-اق تەرگەۋ جانە سوت ورگاندارىنىڭ زاڭسىز ارەكەتتەرى تۋرالى مالىمدەمەلەر جاريالاپ، شىندىققا جاناسپايتىن اقپارات تاراتقان. سوت بۇل دەرەكتەردىڭ جالعان ەكەنىن، ال تەرگەۋ ورگاندارى قىزمەتىنىڭ زاڭدىلىعىن راستايتىن سوت اكتىلەرى بار ەكەنىن انىقتادى.
سوعان قاراماستان، ادۆوكات پەن ونىڭ قورعاۋىنداعى تۇلعالاردىڭ قۇقىقتارى بۇزىلدى دەگەن مازمۇنداعى اقپارات قوعامعا تاراتىلعان. تالاپ قويۋشى تاراپتىڭ ۋاجىنشە، ازاپتاۋ فاكتىلەرى جونىندە نەگىزسىز جاريا مالىمدەمەلەر جاساۋ، سوت جۇيەسىنىڭ بەدەلىن تۇسىرەتىن پىكىرلەر ءبىلدىرۋ ادۆوكات مارتەبەسىن تەرىس پايدالانۋ بولىپ تابىلادى جانە تەرگەۋ ورگاندارىنا قىسىم كورسەتۋ ماقساتىندا قولدانىلعان.
ادىلەت مينيسترلىگى مۇنداي ارەكەتتەردىڭ جۇيەلى ءارى جاريا سيپاتتا بولعانىن، ولاردىڭ ءادىل سوت پەن ادۆوكاتۋرا ينستيتۋتىنىڭ بەدەلىنە نۇقسان كەلتىرەتىنىن اتاپ ءوتتى. بۇل ءمان-جايلار ادۆوكاتتى ليسەنزيادان ايىرۋ تۋرالى تالاپ قويۋعا نەگىز بولعان.
سوت تاراپتاردىڭ دالەلدەرىن، ءىس ماتەريالدارىن جان-جاقتى زەردەلەي كەلە، تالاپ ارىزدى قاناعاتتاندىرۋ تۋرالى شەشىم قابىلدادى. ناتيجەسىندە ادۆوكات ادام مۇرات ادۆوكاتتىق قىزمەتپەن اينالىسۋ قۇقىعىنان ايىرىلدى.
