Sherzat Bolattyń ólimine qatysty qylmystyq is sotqa joldandy. Zańger Meiirman Shekeevtiń aitýynsha, bastapqyda 11 adam kúdikti retinde qarastyrylǵan. Alaida qazirgi tańda is boiynsha toǵyz adamǵa ǵana aiyp taǵylǵan, dep habarlaidy Dalanews.kz.
“Bizdiń qolymyzǵa túsken is materialdaryna sáikes, shyn máninde 13 adam bolmaǵan. Alǵashynda 11 kúdikti týraly aityldy, biraq qazirgi tańda is boiynsha 9 adam aiyptalýshy bolyp otyr. Olardyń bireýi – kámelet jasqa tolmaǵan azamat. Qazirgi tańda tek osy azamatqa ǵana qylmystyq is týraly habarlamalyq aiyp taǵyldy. Qalǵandaryna Qylmystyq kodekstiń 293-babynyń 3-bóligi boiynsha aiyp taǵylyp otyr, al eki kúdiktige adam óltirý faktisi boiynsha aiyp taǵyldy”, – dedi advokat.
Sondai-aq ol Qarjaýbai Nurymovtyń burynǵy jáne qazirgi qorǵaýshylary arasynda eshqandai daý-damai joq ekenin atap ótti.
“Qarjaýbaidyń otbasy da, biz de burynǵy advokattardyń eńbegin joqqa shyǵarmaimyz. Biraq qazirgi tańda olardyń bergen senimhattary keri qaitaryldy. Alaida áleýmettik jelide keibir adamdar advokattar bir-birimen arazdasyp jatyr dep jalǵan aqparat taratýda. Bul shyndyqqa janaspaidy,” – dep túsindirdi Shekeev.
Advokattyń aitýynsha, qylmystyq is 26 naýryzda Almaty oblysy Qylmystyq ister jónindegi mamandandyrylǵan aýdanaralyq sotyna túsken.
Aita keteiik, buǵan deiin tergeý barysynda 40 sot-meditsinalyq saraptama júrgizilip, 200-ge jýyq kýágerden jaýap alynǵan. Kúdiktilerdiń aiǵaqtary muqiiat tekserilip, segiz beinejazba saraptalǵan. Qylmystyq istiń jalpy kólemi – 62 tom.
Qazirgi tańda is boiynsha toǵyz adam kúdikti dep tanylǵan:
• Shyńǵys Belgojaev
• Darhan Áskentai
• Nurqiias Iliasov
• Ravil Sakiev
• Nurbol Toqtaýbaev
• Didar Qaliahmet
• Azamat Toqtaýbaev
• Dýman Ysqaq
• Abzal Shynasyl
Buǵan deiin tergeý organdary kúdiktiler sany 11 dep habarlaǵan bolatyn.
Tergeýdiń barlyq kezeńderinde zańdylyq pen obektivtilik saqtalǵany aityldy. Protsess prokýratýra organdarynyń baqylaýynda boldy.
Eske salaiyq, 2024 jyldyń 4 qazanynda Talǵarda 16 jastaǵy jasóspirim Sherzat Bolat qaza tapqan edi. Keiinnen onyń aǵasy Nurqanat Ǵaiypbaev ta óli kúiinde tabyldy.
