شەرزات بولاتتىڭ ولىمىنە قاتىستى قىلمىستىق ءىس سوتقا جولداندى. زاڭگەر مەيىرمان شەكەيەۆتىڭ ايتۋىنشا، باستاپقىدا 11 ادام كۇدىكتى رەتىندە قاراستىرىلعان. الايدا قازىرگى تاڭدا ءىس بويىنشا توعىز ادامعا عانا ايىپ تاعىلعان، دەپ حابارلايدى Dalanews.kz.

“ءبىزدىڭ قولىمىزعا تۇسكەن ءىس ماتەريالدارىنا سايكەس، شىن مانىندە 13 ادام بولماعان. العاشىندا 11 كۇدىكتى تۋرالى ايتىلدى، ءبىراق قازىرگى تاڭدا ءىس بويىنشا 9 ادام ايىپتالۋشى بولىپ وتىر. ولاردىڭ بىرەۋى – كامەلەت جاسقا تولماعان ازامات. قازىرگى تاڭدا تەك وسى ازاماتقا عانا قىلمىستىق ءىس تۋرالى حابارلامالىق ايىپ تاعىلدى. قالعاندارىنا قىلمىستىق كودەكستىڭ 293-بابىنىڭ 3-بولىگى بويىنشا ايىپ تاعىلىپ وتىر، ال ەكى كۇدىكتىگە ادام ءولتىرۋ فاكتىسى بويىنشا ايىپ تاعىلدى”، – دەدى ادۆوكات.

سونداي-اق ول قارجاۋباي نۇرىموۆتىڭ بۇرىنعى جانە قازىرگى قورعاۋشىلارى اراسىندا ەشقانداي داۋ-داماي جوق ەكەنىن اتاپ ءوتتى.

“قارجاۋبايدىڭ وتباسى دا، ءبىز دە بۇرىنعى ادۆوكاتتاردىڭ ەڭبەگىن جوققا شىعارمايمىز. ءبىراق قازىرگى تاڭدا ولاردىڭ بەرگەن سەنىمحاتتارى كەرى قايتارىلدى. الايدا الەۋمەتتىك جەلىدە كەيبىر ادامدار ادۆوكاتتار بىر-بىرىمەن ارازداسىپ جاتىر دەپ جالعان اقپارات تاراتۋدا. بۇل شىندىققا جاناسپايدى،” – دەپ ءتۇسىندىردى شەكەيەۆ.

ادۆوكاتتىڭ ايتۋىنشا، قىلمىستىق ءىس 26 ناۋرىزدا الماتى وبلىسى قىلمىستىق ىستەر جونىندەگى مامانداندىرىلعان اۋدانارالىق سوتىنا تۇسكەن.

ايتا كەتەيىك، بۇعان دەيىن تەرگەۋ بارىسىندا 40 سوت-مەديسينالىق ساراپتاما جۇرگىزىلىپ، 200-گە جۋىق كۋاگەردەن جاۋاپ الىنعان. كۇدىكتىلەردىڭ ايعاقتارى مۇقيات تەكسەرىلىپ، سەگىز بەينەجازبا ساراپتالعان. قىلمىستىق ءىستىڭ جالپى كولەمى – 62 توم.

قازىرگى تاڭدا ءىس بويىنشا توعىز ادام كۇدىكتى دەپ تانىلعان:

• شىڭعىس بەلگوجايەۆ

• دارحان اسكەنتاي

• نۇرقياس يلياسوۆ

• راۆيل ساكييەۆ

• نۇربول توقتاۋبايەۆ

• ديدار قالياحمەت

• ازامات توقتاۋبايەۆ

• دۋمان ىسقاق

• ابزال شىناسىل

بۇعان دەيىن تەرگەۋ ورگاندارى كۇدىكتىلەر سانى 11 دەپ حابارلاعان بولاتىن.

تەرگەۋدىڭ بارلىق كەزەڭدەرىندە زاڭدىلىق پەن وبەكتيۆتىلىك ساقتالعانى ايتىلدى. پروسەسس پروكۋراتۋرا ورگاندارىنىڭ باقىلاۋىندا بولدى.

ەسكە سالايىق، 2024 جىلدىڭ 4 قازانىندا تالعاردا 16 جاستاعى ءجاسوسپىرىم شەرزات بولات قازا تاپقان ەدى. كەيىننەن ونىڭ اعاسى نۇرقانات عايىپبايەۆ تا ءولى كۇيىندە تابىلدى.