Talǵardaǵy janjal kezinde qaza tapqan jasóspirim Sherzat Bolattyń ákesi Qarjaýbaı Nurymov jaqynda 15 táýlikke qamaldy. Onyń qaryndasy Baqyt Reımovaǵa da «mıtıńke úndegeni úshin» degen aıyp taǵylyp, 15 táýlikke jabyldy. Sonymen qatar Reımovany sot Qazaqstannan deportasıalaý jóninde sheshim shyǵarǵan. Biraq advokaty munymen kelispeıtinin aıtty, - dep habarlaıdy Dalanews.kz Malim.kz-ke silteme jasap.
Bloger Jan Ahmadıev advokat Meıirman Shekeevtiń pikirin suraǵan eken. Ol qazir osy ispen aınalysyp jatyr.
– Baqyt qazir Uzynaǵashtaǵy ýaqytsha ustaý ızolátorynda otyr. Biz sol jerge baryp qaıttyq. Apelásıalyq shaǵymdy daıyndap qoıdyq. Oǵan Ákimshilik kodekstiń 488-babynyń 8-bóligi boıynsha aıyp taǵylǵan. Iaǵnı sheteldikter, azamattyǵy joq adamdar jasaǵan áreket boıynsha qamaýda otyr. Qazaqstannan deportasıalaý jóninde jaza kesilgen. Biz munymen kelispeımiz. Qaýlyda birneshe zańbuzýshylyq bar. Baqytqa zańsyz demonstrasıa, pıketke úndedi degen aıyp taǵylǵan. Biraq zańdaǵy anyqtamaǵa sáıkes mundaı zańsyz jıynǵa shaqyrýdyń uıymdastyrýshysy bolady. Reımovanyń ondaı kinási dáleldenbegen. Sosyn balasynyń qujatyn suratqan. Balasy Qazaqstanda dúnıege kelgen. Bala men anany ajyratýǵa bolmaıdy. Qazaqstan ana men balany ajyratpaýǵa mindetti. Sot osy halyqaralyq shartty óreskel buzǵan. Baqyttyń etnıkalyq qazaq ekeni eskerilmegen. «Qandas» degen qujaty bar. Olardy deportasıalaýǵa bolmaıdy. Óıtkeni baratyn jeri joq. Otany – Qazaqstan. Biz kinásizdigin dáleldep, Qazaqstanda qaldyrýǵa tyrysyp jatyrmyz, – deıdi Meıirman Shekeev.
Eske salaıyq,Sherzat Bolattyń birneshe týysy qamaýǵa alynǵan bolatyn.
Eńbekshiqazaq aýdandyq soty ákimshilik is júrgizý tártibimen isterdi qaraý nátıjeleri boıynsha azamat Saltanat Nurymova usaq buzaqylyq jasaǵany úshin (ÁQBtK 434-babynyń 1-bóligi) 20 AEK mólsherinde aıyppul salýmen ákimshilik jaýapkershilikke tartyldy.
QR beıbit jınalystardy uıymdastyrý jáne ótkizý tártibi týraly zańnamasyn buzǵany úshin (ÁQBtK 488- babynyń 8-bólimi.) azamattyǵy joq Baqyt Reımova ákimshilik tártippen 15 táýlikke qamaýǵa alynyp, keıinnen QR sheginen shyǵaryp jiberildi.
Qoǵamdyq orynda balaǵat sózder aıtqany, quqyq qorǵaý organdarynyń qyzmetkerlerin qorlap, sondaı-aq qoǵamdyq tártip pen azamattardyń tynyshtyǵyn buzatyn aınalasyndaǵylarǵa qurmetsizdik tanytatyn is-áreketter jasaǵany jáne kólik quraldarynyń qozǵalysy úshin kedergiler jasaǵany úshin Qarjaýbaı Nurymov 15 táýlikke ákimshilik qamaýǵa alyndy.
10 jeltoqsanda marqum Sherzat Bolattyń otbasy Nurqanat Ǵaıypbaevty jer qoınyna tapsyrdy. Jerleý rásiminen keıin Qarjaýbaı Nurymov qolyna pyshaq ustap, BAQ ókilderimen kezdesýdi talap etti. Atalǵan oqıǵadan keıin Nurymovty polısıa qyzmetkerleri ustap áketti.
Resmı derekke súıensek, saǵat 15:30 shamasynda Azat aýylynda jerleý rásimi kezinde qoǵamdyq tártip buzylǵan. Aıtýlarynsha, Qarjaýbaı Nurymov qolyna pyshaq ustap, óz-ózine qol jumsamaq bolǵan.
"Qarjaýbaı Nurymov prokýrordyń zańdy saqtaý týraly túsindirmelerin elemedi. Shekten tys agressıvti minez-qulyq tanytyp, basqalardy óz-ózine qol jumsaımyn dep qorqytty. Sonymen qatar polısıa qyzmetkerine pyshaqpen shabýyl jasady. Onyń minez-qulqy ózine de, basqalarǵa da qaýip tóndirdi", - delingen habarlamada.
