تالعارداعى جانجال كەزىندە قازا تاپقان ءجاسوسپىرىم شەرزات بولاتتىڭ اكەسى قارجاۋباي نۇرىموۆ جاقىندا 15 تاۋلىككە قامالدى. ونىڭ قارىنداسى باقىت رەيموۆاعا دا «ميتينگكە ۇندەگەنى ءۇشىن» دەگەن ايىپ تاعىلىپ، 15 تاۋلىككە جابىلدى. سونىمەن قاتار رەيموۆانى سوت قازاقستاننان دەپورتاسيالاۋ جونىندە شەشىم شىعارعان. ءبىراق ادۆوكاتى مۇنىمەن كەلىسپەيتىنىن ايتتى، - دەپ حابارلايدى Dalanews.kz Malim.kz-كە سىلتەمە جاساپ. 

بلوگەر جان احمادييەۆ ادۆوكات مەيىرمان شەكەيەۆتىڭ پىكىرىن سۇراعان ەكەن. ول ءقازىر وسى ىسپەن اينالىسىپ جاتىر.

– باقىت ءقازىر ۇزىناعاشتاعى ۋاقىتشا ۇستاۋ يزولياتورىندا وتىر. ءبىز سول جەرگە بارىپ قايتتىق. اپەلياسيالىق شاعىمدى دايىنداپ قويدىق. وعان اكىمشىلىك كودەكستىڭ 488-بابىنىڭ 8-بولىگى بويىنشا ايىپ تاعىلعان. ياعني شەتەلدىكتەر، ازاماتتىعى جوق ادامدار جاساعان ارەكەت بويىنشا قاماۋدا وتىر. قازاقستاننان دەپورتاسيالاۋ جونىندە جازا كەسىلگەن. ءبىز مۇنىمەن كەلىسپەيمىز. قاۋلىدا بىرنەشە زاڭبۇزۋشىلىق بار. باقىتقا زاڭسىز دەمونستراسيا، پيكەتكە ۇندەدى دەگەن ايىپ تاعىلعان. ءبىراق زاڭداعى انىقتاماعا سايكەس مۇنداي زاڭسىز جيىنعا شاقىرۋدىڭ ۇيىمداستىرۋشىسى بولادى. رەيموۆانىڭ ونداي كىناسى دالەلدەنبەگەن. سوسىن بالاسىنىڭ قۇجاتىن سۇراتقان. بالاسى قازاقستاندا دۇنيەگە كەلگەن. بالا مەن انانى اجىراتۋعا بولمايدى. قازاقستان انا مەن بالانى اجىراتپاۋعا مىندەتتى. سوت وسى حالىقارالىق شارتتى ورەسكەل بۇزعان. باقىتتىڭ ەتنيكالىق قازاق ەكەنى ەسكەرىلمەگەن. «قانداس» دەگەن قۇجاتى بار. ولاردى دەپورتاسيالاۋعا بولمايدى. ويتكەنى باراتىن جەرى جوق. وتانى – قازاقستان. ءبىز كىناسىزدىگىن دالەلدەپ، قازاقستاندا قالدىرۋعا تىرىسىپ جاتىرمىز، – دەيدى مەيىرمان شەكەيەۆ.

ەسكە سالايىق،شەرزات بولاتتىڭ بىرنەشە تۋىسى قاماۋعا الىنعان بولاتىن. 

ەڭبەكشىقازاق اۋداندىق سوتى اكىمشىلىك ءىس جۇرگىزۋ تارتىبىمەن ىستەردى قاراۋ ناتيجەلەرى بويىنشا ازامات سالتانات نۇرىموۆا ۇساق بۇزاقىلىق جاساعانى ءۇشىن (اقبتك 434-بابىنىڭ 1-بولىگى) 20 اەك مولشەرىندە ايىپپۇل سالۋمەن اكىمشىلىك جاۋاپكەرشىلىككە تارتىلدى.

ق ر بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى زاڭناماسىن بۇزعانى ءۇشىن (اقبتك 488- بابىنىڭ 8ء-بولىمى.) ازاماتتىعى جوق باقىت رەيموۆا اكىمشىلىك تارتىپپەن 15 تاۋلىككە قاماۋعا الىنىپ، كەيىننەن ق ر شەگىنەن شىعارىپ جىبەرىلدى.

قوعامدىق ورىندا بالاعات سوزدەر ايتقانى، قۇقىق قورعاۋ ورگاندارىنىڭ قىزمەتكەرلەرىن قورلاپ، سونداي-اق قوعامدىق ءتارتىپ پەن ازاماتتاردىڭ تىنىشتىعىن بۇزاتىن اينالاسىنداعىلارعا قۇرمەتسىزدىك تانىتاتىن ىس-ارەكەتتەر جاساعانى جانە كولىك قۇرالدارىنىڭ قوزعالىسى ءۇشىن كەدەرگىلەر جاساعانى ءۇشىن قارجاۋباي نۇرىموۆ 15 تاۋلىككە اكىمشىلىك قاماۋعا الىندى.

10 جەلتوقساندا مارقۇم شەرزات بولاتتىڭ وتباسى نۇرقانات عايىپبايەۆتى جەر قوينىنا تاپسىردى. جەرلەۋ راسىمىنەن كەيىن قارجاۋباي نۇرىموۆ قولىنا پىشاق ۇستاپ، ب ا ق وكىلدەرىمەن كەزدەسۋدى تالاپ ەتتى. اتالعان وقيعادان كەيىن نۇرىموۆتى پوليسيا قىزمەتكەرلەرى ۇستاپ اكەتتى. 

رەسمي دەرەككە سۇيەنسەك، ساعات 15:30 شاماسىندا ازات اۋىلىندا جەرلەۋ ءراسىمى كەزىندە قوعامدىق ءتارتىپ بۇزىلعان. ايتۋلارىنشا، قارجاۋباي نۇرىموۆ قولىنا پىشاق ۇستاپ، وز-وزىنە قول جۇمساماق بولعان.

"قارجاۋباي نۇرىموۆ پروكۋروردىڭ زاڭدى ساقتاۋ تۋرالى تۇسىندىرمەلەرىن ەلەمەدى. شەكتەن تىس اگرەسسيۆتى مىنەز-قۇلىق تانىتىپ، باسقالاردى وز-وزىنە قول جۇمسايمىن دەپ قورقىتتى. سونىمەن قاتار پوليسيا قىزمەتكەرىنە پىشاقپەن شابۋىل جاسادى. ونىڭ مىنەز-قۇلقى وزىنە دە، باسقالارعا دا ءقاۋىپ ءتوندىردى"، - دەلىنگەن حابارلامادا.