Búgin Úkimettiń janynan qurylǵan jer komissiiasynyń úshinshi otyrysy ótip, olar jerdi sheteldikterge jalǵa berý-bermeý máselesin talqyǵa saldy. Aqparattarǵa qaraǵanda, komissiia músheleri óz pikirlerinde qalǵan. Birinshi otyrysynda jerdi satý men sheteldikterge jalǵa berý máselesin daýysqa salǵanda 70 adamnyń 11-i ǵana qarsy daýys bergenin bilemiz. Qazir sol 11 adamnyń ishindegi eń belsendisi, «Alash joly» qozǵalysynyń múshesi Maqsat Iliiasuly qamaýda otyr. Qalǵan 10 adamnyń qanshaýy sózinen taiqyp, raiynan qaitqanyn biz bilmeimiz.
Osy 10 adamnyń ishinde qoǵam qairatkeri, aqyn Muhtar Shahanov bar bolýǵa tiis. Komissiia tóraǵasy Baqytjan Saǵyntaevtyń pikirine júginer bolsaq, bul komissiia eshteńeni sheshpeidi. Tek talqylaý, eldiń sózin tyńdaýmen jáne sodan shyqqan qorytyndyny Parlamentke usynýǵa qaýqarly. Negizgi túiindi Parlament qoiady. Durys delik. Sóz aýandaryna qaraǵanda, komissiia daýys berý arqyly jerdiń satylý jáne sheteldikterge jalǵa berilýine, odan basqa da kóptegen suraqtarǵa jaýap bermek. Bizdińshe, komissiianyń negizgi quramy bilik ókilderi bolǵandyqtan, olar báribir jerdi satýǵa jáne jalǵa berýge múddelilik tanytady.
Buǵan qazirdiń ózinde oblystardy aralap, halyqpen kezdesý ótkizip júrgen komissiia músheleriniń aitqan sózderi dálel. Kúni keshe Qyzylorda oblysyna barǵan komissiia músheleri jerdi satýdy ári jalǵa berýdi qoldaitynyn ashyq aitqanyn «Azattyq» saity jariialady.
Demek, endi negizgi kúsh komissiia quramyndaǵy Muhtar Shahanov, Muhtar Taijan, Januzaq Ákim, Aidos Sarym, Dos Kóshim sekildi azamattarǵa túsedi jáne olardyń tabandylyǵy aýadai qajet. Eger olar sózinen taiqysa, halyqtyń tilegin emes, biliktiń ýájine iek súiese, onda tarih aldynda da, halyq aldynda da aqtala almaidy.
Ásirese, jurtshylyq, qarapaiym aýyl turǵyndary Shahanovqa ólerdei senedi. Ol kisiniń dál osy joly tabandylyq tanytaryna senimderi mol.
Eger burynǵy uranshyldyǵymen ketip, sońyna deiin kúrese almasa, jerdi sheteldikterge jalǵa berýge múldem qarsy bolyp, óz pozitsiiasynda tura almasa, qalaida qazaq jerin kelimsekterdiń qolyna bermeý úshin kúrespese, onda qarapaiym halyq basqadan buryn, Shahanovty keshire almasy anyq.
Biz Aral, Jeltoqsan, Til máselesindegi Shahanovty emes, Jer máselesindegi Shahanovtyń batyldyǵyn; aiǵaishyldyǵyn emes, tabandylyǵyn, komissiia otyrystaryndaǵy popýlistigin emes, shynaiy ótkir minezdiligin kórgimiz keledi. Bir-aq jol bar: jerdi sheteldikterge satýǵa bolmaidy. Eldiń oiy – osy!
Eger, alda-jalda Shahanov jalt berer bolsa, onda ony bizdiń halyq, myna biz eshqashan keshirmeimiz. Sebebi, bilik raiynan qaitar emes. Olardyń bar oiy jerdi satý jáne jalǵa berý. Shahanov sekildi jurtty sońynan erte alatyn adamdar osyndaida qolynan kelgenniń bárin jasaýy kerek.
Shahanov myrza, Siz tarih aldyndaǵy syn saǵatta tursyz! Bul syn saǵat burynǵysynan bólek! Qazaq bolý men bordai tozýdyń sheginde tur. Biz Sizge senemiz! Senimimizdi aqtaidy degen úmittemiz.
Qurmetpen Tileýbek Ospan, zeinetker.
