Jambyl oblysynyń qylmystyq ister jónindegi mamandandyrylǵan aýdanaralyq soty Gúlaiym Rahmonova qatysqan jol-kólik oqiǵasyna qatysty isti qaraý kúnin belgiledi, dep habarlaidy Dalanews.kz.
Tanymal qazaqstandyq faiter Shavkat Rahmonovtyń jubaiyna qatysty qylmystyq is sotqa joldandy.
"QR Qylmystyq kodeksiniń 345-baby 4-bóligi boiynsha aiyptalǵan Rahmonova Gúlaiym Sársenbekqyzyna qatysty qylmystyq is Jambyl oblysynyń qylmystyq ister jónindegi mamandandyrylǵan aýdanaralyq sotynyń óndirisine qabyldansyn. Is boiynsha aldyn ala tyńdaý 2026 jylǵy 16 aqpanda saǵat 15:00-de osy sot ǵimaratynda ótedi", – dep jazylǵan sot habarlamasynda.
Sot protsesi qazaq tilinde júrgiziletini aityldy.
Eske salaiyq, Gúlaiym Rahmonova men onyń uly 2025 jyly 27 shildede jol apatyna túsken edi.
Politsiianyń málimetinshe, respýblikalyq mańyzy bar Almaty–Ekaterinbýrg tasjolynyń 299-shaqyrymynda Toyota Land Cruiser 200 kóliginiń júrgizýshisi tizginge ie bola almai, kólikti aýdaryp alǵan. Jol apaty saldarynan eki áiel qaza tapqan bolatyn.
