Ózbekstannyń lıberal-demokratıalyq partıasy sársenbi kúngi sezinde el prezıdenti qyzmetin ýaqytsha atqarýshy, premer-mınıstr Shavkat Mırzıaevti memleket basshysy saılaýyna úmitker retinde bekitti. Bul týraly baq.kz saıty RIA Novostı agenttigine silteme jasap habarlady.

"Sıeze Shavkat Mırzıaev kandıdatýrasy biraýyzdan maquldandy", – dedi aqparat agenttigine partıa ókili. Onyń aıtýynsha, jaqyn kúnderi partıa Ortalyq saılaý komısıasyna úmitker týraly maǵlumat ótkizýi kerek.

Zańǵa sáıkes, prezıdenttikke úmitkerlerdi tirkeý úshin partıalar OSK-ge Ózbekstandaǵy barlyq saılaýshylardyń kem degende 1 paıyzynyń (214,35 myń adam) qoly qoıylǵan qaǵazdaryn tapsyrýy tıis. Prezıdent qyzmetine úmitkerlerdi tirkeý 30 qazanda aıaqtalady.

OSK 23 qyrkúıekte elde tirkelgen tórt partıaǵa Ózbekstan prezıdentin saılaýǵa qatysýǵa ruqsat berdi.

Ótken aptada Ulttyq demokratıalyq "Mıllıı tıklanısh" ("Ulttyq qaıta órkendeý") partıasy sezinde parlamenttiń tómengi palatasy spıkeriniń orynbasary Sarvar Otamýradovty úmitker retinde bekitti. Ózbekstannyń halyqtyq-demokratıalyq partıasy atynan Hotamjon Ketmonov úmitker atansa, "Adolat" sosıal-demokratıalyq partıasy atynan Narımon Ýmarov bekitildi.

Ózbekstandaǵy prezıdent saılaýy 4 jeltoqsanda ótedi.