Jetisý oblysynda «Taza Qazaqstan» baǵdarlamasy aiasynda eldi mekenderdi kógaldandyrý, kóp qabatty úilerdiń shatyrlary men qasbetterin, sondai-aq aryq júielerin jóndeý jumystary júrgizilýde. Osy jyldyń basynan beri oblys ortalyǵy Taldyqorǵan qalasynda ótken ekologiialyq sharalarǵa 6 myńǵa jýyq turǵyn qatysty,- dep habarlaidy Dalanews.kz
Taldyqorǵanda jalpy aýdany 124 ga bolatyn 5 saiabaq pen 40 gúlzar bar. Jyl basynan beri oblys ortalyǵynda 10 myń aǵash otyrǵyzyldy. Bul rette jasyl aimaqtardy kútip ustaý úshin 10 ýchaskede 5 merdiger uiym jumys isteidi. Sonymen qatar abattandyrý jumystary júrgizilýde.
- «Taza Qazaqstan» baǵdarlamasy aiasynda biyl biz 37 úidiń shatyry men 20 kópqabatty úidiń qasbetine jóndeý jumystaryn júrgizip jatyrmyz. Sondai-aq, 7,4 km aryq jelilerin qaita jańartý kózdelgen. Bul jumystar qazirdiń ózinde qarqyndy júrgizilip jatyr. Jyl basynan beri qalada barlyǵy 37 ekologiialyq is-shara ótkizilip, oǵan 6 myńǵa jýyq qala turǵyny qatysty. Munyń bári jalpy alǵanda tazalyq pen tártipti saqtaýǵa, oblys ortalyǵyn abattandyrýǵa, sondai-aq ekologiialyq mádenietti nyǵaitýǵa oń áser etedi, - dep atap ótti Taldyqorǵan qalasy ákiminiń orynbasary Qýanysh Seitimbetov.
Qala turǵyndary men qonaqtary abattandyrý sharalaryna qatysty pikir bildirdi.
- Jergilikti turǵyn retinde Taldyqorǵan qalasynyń jyldan jylǵa ósip kele jatqanyna qýanamyn. Basqa qalalardan kelgen dostarymyz da bizdiń Taldyqorǵannyń jaqsaryp kele jatqanyn jii aitady. Bul – qala turǵyndarynyń ortaq eńbegi, - deidi taldyqorǵandyq Serik Qojahanov.
Al Almaty qalasynyń turǵyny Mánshúk Qarakenova Taldyqorǵannyń jalpy kelbetin jaqsartýǵa «Taza Qazaqstan» baǵdarlamasy aitarlyqtai áser etti dep esepteidi:
- «Taza Qazaqstan» baǵdarlamasynyń arqasynda Taldyqorǵan qalasy ádemi ári taza keipin saqtap otyr. Qalanyń ózi de jasyl jelekti, aýasy taza, al turǵyndardyń tazalyq pen tártipti saqtaýy, senbilikterge belsendi qatysýy, týǵan jerdiń tazalyǵyna jaýapkershilikpen qaraýynyń arqasynda qala burynǵydan da jaqsara tústi. Men bul qalany burynnan jaqsy kóremin jáne osynda kelgen saiyn riza bolamyn, - deidi ol.
