– Bıyl aýyl sharýashylyǵy salasynda kórsetkish joǵary. Jetistikke toly jyl bolaıyn dep tur. Kóp jumys atqaryldy. Bul – osy saladaǵy azamattardyń, halyqtyń eńbeginiń jemisi. Endi osy jetistikke jetý jolyn úıretý úshin sharýalardy jınap, semınar ótkizý kerek. Kókónis, bıdaıǵa qatysty semınar ótkizip, tájirıbemen bólisken jón. Egistik basyna aparyp, tehnıkalar men tehnologıalardy kórsetý arqyly jurtshylyqty aýyl sharýashylyǵyna qyzyqtyra alamyz, – dedi Ómirzaq Shókeev.
Túrkistan oblystyq aýyl sharýashylyǵy basqarmasynyń basshysy T.Ospanovtyń aıtýynsha, bıyl oblysta maqta daqyly 126,3 myń gektarǵa egilgen. Jalpy 345 myń tonna shıtti maqta jınalyp, ótken jylǵy kórsetkishten artady dep josparlanyp otyr. Maqta baǵasy bıyl 400 teńge kóleminde bolady dep kútilýde. 2021 jyly bir kelisiniń baǵasy 320-380 teńge aralyǵynda bolǵan.
Bıyl aýyl sharýashylyǵy daqyldary 859,9 myń gektarǵa egilip, ótken jylmen salystyrǵanda 14,4 myń gektarǵa artyp otyr. Onyń ishinde dándi-daqyldar 313 myń gektarǵa egilse, kókónis, baqsha, kartop 119,4 myń gektarǵa egilgen.
Búgingi kúnge 254 myń gektarǵa egilgen astyqty orý naýqany aıaqtaldy. Gektar túsimdiligi 19 sentnerdi qurap, ótken jyldan 8,7 sentnerge artyp, 471,3 myń tonna ónim jınaldy. Kókónis pen baqsha boıynsha 2,8 mln tonna ónim jınalsa, 112,6 myń tonna jemis-jıdek jınalǵan.
Oblys ákiminiń tapsyrmasymen júzege asyrylyp jatqan «Bir alqaptan jylyna 2-3 ónim alý» jobasy boıynsha bıyl 8,4 myń gektarda 3000 joba iske asyryldy, birinshi, ekinshi ónimnen 230 myń tonna kókónis ónimi jınalyp, jumystar jalǵasýda. 85,5 gektarǵa jańa jylyjaılar salynyp, jalpy kólemi 1552 gektardy qurady. Búgingi kúnge jylyjaılar esebinen 118 myń tonna ónim óndirilgen.
Jalpy bıyl memleket tarapynan kúzgi jıyn-terim jumystaryna 48 myń tonna janar-jaǵar maı bólinip, agroqurylymdarǵa lıtri 200-202 teńgeden berilip jatyr. Bul – naryqtyq baǵadan 15-20% tómen. 522 túrli mıneraldy tyńaıtqyshtardyń qunyn 50%-yn sýbsıdıalaýǵa búdjetten qarjy bólindi.
