Sharýalar tamshylatyp, jańbyrlatyn sýǵarý júiesine belsendi túrde kóshýi kerek, – Qanat Bozymbaev
Aýyl turǵyndary oblys ákimine sheshimin kútken birqatar máseleleri bar ekenin jetkizdi. Olardyń aitýynsha, jańa sý qubyry tartylǵanymen aýylda aýyz sýǵa qosylý men úzdiksiz sý berýde qiyndyqtar áli bar. Aýyldaǵy mektepte ashana joq, sportzal jertólede ornalasqan, al bastaýysh synyp oqýshylary beiimdelgen ǵimaratta oqyp júr. Aýyldyń feldsherlik-akýsherlik pýnktiniń mamandary burynǵy meshit ǵimaratynda otyr. Eldi meken kóshelerinde jaryq shamdary joq. Jaiylymdyq jer jetispeidi. Balalar men jastardyń bos ýaqytyn paidaly uiymdastyrýǵa yqpal etetin mádeniet úii kerek. Aýyl turǵyndary uialy bailanys sapasyzdyǵyna, jol jóndelmegenine shaǵym bildirdi.
Turǵyndardyń barlyq ótinish-tilekterin muqiiat tyńdaǵan Qanat Bozymbaev sóz bolǵan máselelerdiń barlyǵy kezeń-kezeńimen sheshiletinin aitty.
– Parlamentte Jer kodeksine ózgerister engizý máselesi qaralyp jatyr. Ózgerister qabyldanǵannan keiin eldi mekenderden shetkeri ornalasqan jerler memleketke qaitarylady. Sonyń negizinde jaiylymdyq jerlerdi de qaitara bastaimyz. Jańa ǵana mektep pen feldsherlik-akýsherlik pýnktte boldym. Eki ǵimarat ta tozyp ketken. Kelesi jyly FAP-qa arnap jańa ǵimarat turǵyzamyz. Mektepti ne demeýshilerdiń qarjysyna, ne biýdjet esebinen salamyz. Bir jylda barlyq máseleni sheship tastaimyz dep aita almaimyn. Óitkeni sizderdiki sekildi aýyldar kóp. Olardyń barlyǵyna da kóńil bólý kerek. Biraq aitqan problemalyq máselelerińizdi aldaǵy jyldardyń josparyna engizemiz, – dedi Qanat Bozymbaev.
Munan soń oblys ákimi sorǵy stansysyna bardy. Munda ol aýyl turǵyndaryn sapaly aýyz sýmen qamtý jumystaryn jyldamdatýdy tapsyrdy.
Qanat Bozymbaev eýrokirpish shyǵaratyn jergilikti zaýyttyń da jumys protsesimen tanysty. Kásiporynnyń óndiristik qýaty jylyna 30 myń kirpish shyǵarýǵa jetedi. «Art-Construction» JShS basshysy Batyrbek Baijigitovtiń aitýynsha, zaýyt biyl 9 mln. kirpish óndirgen. Ónimdi ótkizý máselesi sheshilgen, tek jumysshy qoly jetispeidi.
Sheńgeldi massiviniń agroónerkásiptik áleýetin damytý úshin irrigatsiialyq júieler men sorǵy stansylaryn jóndeý qajet. Bul baǵytta atqarylǵan jumystar men aldaǵy josparlar týraly Qapshaǵai qalasynyń ákimi Nurlan Qumataev baiandap berdi. Qanat Aldabergenuly bul jumysqa jańasha kózqaras kerek ekenin aitty.
– Irrigatsiialyq júielerdi jańa pritsipterge súienip, kásipkerlermen birlese otyryp, qaita qalpyna keltiremiz. Tek ylǵal saqtaý tehnologiiasyn qoldanyp otyrǵan sharýashylyqtarǵa ǵana kanaldardy biýdjet esebinen jóndeitin bolamyz. Sýdy ysyrap etpei, jumys tiimdiligin arttyrý úshin sharýalar zamanaýi agrotehnologiiany, tamshylatyp, jańbyrlatyn sýǵarý júielerin belsendi qoldanýǵa kóshýi kerek, – dedi Qanat Bozymbaev.
Oblys ákimi «Dinara Group» quramyna kiretin «Plemzavod – Almaty» iri aýyl sharýashylyǵy óndiristik kooperativinde bolyp, Qapshaǵai óńiriniń mal sharýashylyǵyndaǵy áleýetin kórdi. Munda 5 myńdai Angýs jáne Gereford asyl tuqymdy iri qara bar. Sonyń 3300-i – analyq bas. Qazir táýligine 70 tonna sút saýylady. Usaq mal basy 15 myńǵa, jyl saiyn tól alý kórsetkishi 95%-ke jetip otyr. Kásiporyn mal azyǵyn ósirýmen de ainalysýda. Nysan basshysy Baqyt Ataibekov túiindi máselelerge de toqtalyp, qyrkúiek aiynan beri sýbsidiia berý keshiktirilip jatqanyn jetkizdi. Bul oraida oblys ákimi aýyl sharýashylyǵy basqarmasynyń basshysyna jedel túrde jaǵdaidy anyqtap, jyldam sheshýdi tapsyrdy.
Qanat Bozymbaev «Oren Space» formatynda Sheńgeldi aýyldyq okrýgi ákimdiginiń jumysymen tanysty. Qazir munda halyqqa memlekettik qyzmettiń 6 túri kórsetiledi.
