اۋىل تۇرعىندارى وبلىس اكىمىنە شەشىمىن كۇتكەن ءبىرقاتار ماسەلەلەرى بار ەكەنىن جەتكىزدى. ولاردىڭ ايتۋىنشا، جاڭا سۋ قۇبىرى تارتىلعانىمەن اۋىلدا اۋىز سۋعا قوسىلۋ مەن ۇزدىكسىز سۋ بەرۋدە قيىندىقتار ءالى بار. اۋىلداعى مەكتەپتە اسحانا جوق، سپورتزال جەرتولەدە ورنالاسقان، ال باستاۋىش سىنىپ وقۋشىلارى بەيىمدەلگەن عيماراتتا وقىپ ءجۇر. اۋىلدىڭ فەلدشەرلىك-اكۋشەرلىك پۋنكتىنىڭ ماماندارى بۇرىنعى مەشىت عيماراتىندا وتىر. ەلدى مەكەن كوشەلەرىندە جارىق شامدارى جوق. جايىلىمدىق جەر جەتىسپەيدى. بالالار مەن جاستاردىڭ بوس ۋاقىتىن پايدالى ۇيىمداستىرۋعا ىقپال ەتەتىن مادەنيەت ءۇيى كەرەك. اۋىل تۇرعىندارى ۇيالى بايلانىس ساپاسىزدىعىنا، جول جوندەلمەگەنىنە شاعىم ءبىلدىردى.
تۇرعىنداردىڭ بارلىق وتىنىش-تىلەكتەرىن مۇقيات تىڭداعان قانات بوزىمبايەۆ ءسوز بولعان ماسەلەلەردىڭ بارلىعى كەزەڭ-كەزەڭىمەن شەشىلەتىنىن ايتتى.
– پارلامەنتتە جەر كودەكسىنە وزگەرىستەر ەنگىزۋ ماسەلەسى قارالىپ جاتىر. وزگەرىستەر قابىلدانعاننان كەيىن ەلدى مەكەندەردەن شەتكەرى ورنالاسقان جەرلەر مەملەكەتكە قايتارىلادى. سونىڭ نەگىزىندە جايىلىمدىق جەرلەردى دە قايتارا باستايمىز. جاڭا عانا مەكتەپ پەن فەلدشەرلىك-اكۋشەرلىك پۋنكتتە بولدىم. ەكى عيمارات تا توزىپ كەتكەن. كەلەسى جىلى فاپ-قا ارناپ جاڭا عيمارات تۇرعىزامىز. مەكتەپتى نە دەمەۋشىلەردىڭ قارجىسىنا، نە بيۋدجەت ەسەبىنەن سالامىز. ءبىر جىلدا بارلىق ماسەلەنى شەشىپ تاستايمىز دەپ ايتا المايمىن. ويتكەنى سىزدەردىكى سەكىلدى اۋىلدار كوپ. ولاردىڭ بارلىعىنا دا كوڭىل ءبولۋ كەرەك. ءبىراق ايتقان پروبلەمالىق ماسەلەلەرىڭىزدى الداعى جىلداردىڭ جوسپارىنا ەنگىزەمىز، – دەدى قانات بوزىمبايەۆ.
مۇنان سوڭ وبلىس اكىمى سورعى ستانسىسىنا باردى. مۇندا ول اۋىل تۇرعىندارىن ساپالى اۋىز سۋمەن قامتۋ جۇمىستارىن جىلدامداتۋدى تاپسىردى.
قانات بوزىمبايەۆ ەۋروكىرپىش شىعاراتىن جەرگىلىكتى زاۋىتتىڭ دا جۇمىس پروسەسىمەن تانىستى. كاسىپورىننىڭ وندىرىستىك قۋاتى جىلىنا 30 مىڭ كىرپىش شىعارۋعا جەتەدى. «Art-Construction» ج ش س باسشىسى باتىربەك بايجىگىتوۆتىڭ ايتۋىنشا، زاۋىت بيىل 9 ملن. كىرپىش وندىرگەن. ءونىمدى وتكىزۋ ماسەلەسى شەشىلگەن، تەك جۇمىسشى قولى جەتىسپەيدى.
شەڭگەلدى ءماسسيۆىنىڭ اگروونەركاسىپتىك الەۋەتىن دامىتۋ ءۇشىن يرريگاسيالىق جۇيەلەر مەن سورعى ستانسىلارىن جوندەۋ قاجەت. بۇل باعىتتا اتقارىلعان جۇمىستار مەن الداعى جوسپارلار تۋرالى قاپشاعاي قالاسىنىڭ اكىمى نۇرلان قۇماتايەۆ بايانداپ بەردى. قانات الدابەرگەن ۇلى بۇل جۇمىسقا جاڭاشا كوزقاراس كەرەك ەكەنىن ايتتى.
– يرريگاسيالىق جۇيەلەردى جاڭا پريسيپتەرگە سۇيەنىپ، كاسىپكەرلەرمەن بىرلەسە وتىرىپ، قايتا قالپىنا كەلتىرەمىز. تەك ىلعال ساقتاۋ تەحنولوگياسىن قولدانىپ وتىرعان شارۋاشىلىقتارعا عانا كانالداردى بيۋدجەت ەسەبىنەن جوندەيتىن بولامىز. سۋدى ىسىراپ ەتپەي، جۇمىس تيىمدىلىگىن ارتتىرۋ ءۇشىن شارۋالار زاماناۋي اگروتەحنولوگيانى، تامشىلاتىپ، جاڭبىرلاتىن سۋعارۋ جۇيەلەرىن بەلسەندى قولدانۋعا كوشۋى كەرەك، – دەدى قانات بوزىمبايەۆ.
وبلىس اكىمى «Dinara Group» قۇرامىنا كىرەتىن «پلەمزاۆود – الماتى» ءىرى اۋىل شارۋاشىلىعى وندىرىستىك كووپەراتيۆىندە بولىپ، قاپشاعاي ءوڭىرىنىڭ مال شارۋاشىلىعىنداعى الەۋەتىن كوردى. مۇندا 5 مىڭداي انگۋس جانە گەرەفورد اسىل تۇقىمدى ءىرى قارا بار. سونىڭ 3300ء-ى – انالىق باس. ءقازىر تاۋلىگىنە 70 توننا ءسۇت ساۋىلادى. ۇساق مال باسى 15 مىڭعا، جىل سايىن ءتول الۋ كورسەتكىشى 95%-كە جەتىپ وتىر. كاسىپورىن مال ازىعىن وسىرۋمەن دە اينالىسۋدا. نىسان باسشىسى باقىت اتايبەكوۆ ءتۇيىندى ماسەلەلەرگە دە توقتالىپ، قىركۇيەك ايىنان بەرى سۋبسيديا بەرۋ كەشىكتىرىلىپ جاتقانىن جەتكىزدى. بۇل ورايدا وبلىس اكىمى اۋىل شارۋاشىلىعى باسقارماسىنىڭ باسشىسىنا جەدەل تۇردە جاعدايدى انىقتاپ، جىلدام شەشۋدى تاپسىردى.
قانات بوزىمبايەۆ «Oren Space» فورماتىندا شەڭگەلدى اۋىلدىق وكرۋگى اكىمدىگىنىڭ جۇمىسىمەن تانىستى. ءقازىر مۇندا حالىققا مەملەكەتتىك قىزمەتتىڭ 6 ءتۇرى كورسەتىلەدى.
