2027 jyldan bastap jedel meditsinalyq járdem barlyq shaqyrtýǵa táýlik boiy barmaityn bolady. Bul týraly Májilis kýlýarynda densaýlyq saqtaý ministri Aqmaral Álnazarova málimdedi, dep habarlaidy Dalanews.kz.
“Jedel járdem qyzmetine jylyna 8 millionnan astam shaqyrtý túsedi. Onyń 60%-y – tórtinshi sanattaǵy qońyraýlar, iaǵni adamdar ózdiginen aýrýhanaǵa jete alatyn jaǵdailar. Sonyń saldarynan ómirine qaýip tónip turǵan naýqastarǵa jedel járdem keshigip jetedi. Halyqaralyq tájiribeni saralai otyryp, biz bul usynysty zań jobasyna engizdik. Onda ómirge qaýip tóndiretin jaǵdaidyń naqty anyqtamasy berilgen jáne qandai jaǵdaida jedel járdem shaqyrylýy tiis ekeni kórsetilgen. Bul norma 2027 jyldan bastap kúshine enedi”, – dedi ministr.
Jańa ózgeristerge sáikes, 103 qyzmeti tórtinshi sanattaǵy shaqyrtýlardy emhanalarǵa joldaidy. Iaǵni, naýqastyń jaǵdaiy tikelei nemese potentsialdy túrde ómirine jáne densaýlyǵyna qaýip tóndirmeitin jaǵdaida emhananyń mobildi brigadalary qyzmet kórsetedi. Olar dúisenbiden senbige deiin tańǵy 8:00-den keshki 18:00-ge deiin, al senbi kúni 8:00-den 12:00-ge deiin jumys isteidi. Qalǵan ýaqytta tórtinshi sanattaǵy shaqyrtýlardy da qosa alǵanda, barlyq shaqyrtýlarǵa jedel járdem feldsherleri barady.
