Kók jailaýdyń tóresi, jelmaiasyna minip jahandy kezgen Asanqaiǵynyń armanyndaǵy jeruiyq meken – Shalkóde jailaýynyń tórinde qazaqtyń ulttyq qundylyqtary jańǵyrtylyp, uzaq jyldar boiy ulyqtalmai umyt bolyp bara jatqan shopandar toiy dúrkiretip atalyp ótildi, – dep habarlaidy Dalanews.kz Almaty oblysy ákiminiń baspasóz qyzmetine silteme jasap.
Kóshpendi eldiń ulttyq mádenieti ulyqtalyp, ultymyzdyń salt-dástúri men óneri, as máziri men dala sporty dáripteletin, jalpy ulttyq bolmysymyz nasihattaldy!
Qasietti Qaradalany meken etken Uiǵyr aýdany aýylsharýashylyǵy men mal sharýashylyǵyna beiimdelgen aýdan. Sharada aýdan ákimi Bota Serikqyzy tórt túligin túgendep, tórt qubylasyn teńestirgen mal sharýashylyǵynyń naǵyz maitalmandary malshylar qaýymynyń merekesimen quttyqtap, mal baǵý men mal basyn kóbeitýde ozyq eńbek etip, jetistikterge jetken birqatar aýyl malshylaryn arnaiy marapattap, mańdai ter men adal eńbekterin elep eskerildi.
Qazaq kúresinen jaýyryny jer iiskemegen palýandar boz kilemde baq synasty. At qulaǵynda oinaityn sportshylar teńge ilýden saiysqa tússe, bilekti jigitter at ústinde aýdaryspaqtan tamasha oiyn kórsetti. Qoshqar kóterýden de birqatar jigitter jarysqa tústi.
Sap túzei tigilgen aqshańqan úilerde as berilip, bir-birimen arqa-jarqa bolysqan aqsaqaldar men aq jaýlyqty analar, ázili jarasqan boz bala boijetkender naǵyz toidyń sánin kirgizdi. Aldaǵy jyldary aýqymy keńeietin esten ketpes dúbirli toi boldy.
