Sheteldik investorlar Qazaqstannyń teńgemen shyǵarylǵan memlekettik obligatsiialaryna qyzyǵýshylyq tanyta bastady. Bir jyldyń ishinde olardyń osy baǵaly qaǵazdarǵa salǵan qarjysy shamamen 2 mlrd dollardan 5 mlrd dollarǵa jýyqtaǵan. Investitsiia aǵyny ulttyq valiýtanyń nyǵaiýyna da yqpal etti, dep habarlaidy dalanews.kz.
Financial Times basylymynyń dereginshe, sheteldikterdiń ieligindegi qazaqstandyq memlekettik obligatsiialardyń kólemi biyl maýsymda naryqtyń onnan bir bóligine jýyqtaǵan. Investorlardy Qazaqstandaǵy joǵary mólsherleme men salystyrmaly túrde turaqty makroekonomikalyq jaǵdai qyzyqtyryp otyr.
Sheteldik kapitaldyń kóptep kelýi teńge baǵamyna da qoldaý kórsetti. 2026 jyldyń basynan beri ulttyq valiýta dollarǵa shaqqanda 9,7 paiyzǵa nyǵaiǵan. Osy kórsetkish boiynsha teńge Eýropa men Aziiadaǵy eń jaqsy nátije kórsetken valiýtalardyń birine ainaldy.
Qazaqstandyq obligatsiialarǵa suranystyń artýyna eldiń boryshtyq naryǵyn halyqaralyq investorlar úshin qoljetimdi etý jospary da áser etken. Qazaqstan memlekettik baǵaly qaǵazdardy Euroclear halyqaralyq esep aiyrysý júiesine qosýdy kózdep otyr. Tikelei bailanysty 2027 jyly iske qosý josparlanǵan. Bul sheteldik investorlarǵa qazaqstandyq obligatsiialardy satyp alý men olar boiynsha esep aiyrysýdy jeńildetpek.
Sonymen qatar Qazaqstan óz obligatsiialaryn damýshy elderdiń memlekettik baǵaly qaǵazdaryn qamtityn JPMorgan GBI-EM indeksine engizýge múddeli. Mundai qadam qazaqstandyq qaryz quraldaryna halyqaralyq qorlardyń nazaryn arttyrýy múmkin.
Eldegi aqsha-kredit sharttary áli de qatań. Ulttyq bank mólsherlemeni eki ret tómendetkennen keiin onyń deńgeii 16,75 paiyzdy qurady. Al infliatsiia shamamen 13 paiyzdan 10 paiyzǵa deiin baiaýlaǵan.
Financial Times saraptamasyna sáikes, joǵary kiristilik, infliatsiianyń tómendeýi jáne qarjy naryǵynyń sheteldik investorlarǵa birtindep ashylýy Qazaqstannyń memlekettik obligatsiialaryn tartymdy investitsiialyq quralǵa ainaldyryp otyr.
