Reseidiń Omby qalasyndaǵy qurylys alańynda bolǵan órtten zardap shekken Qazaqstan azamaty Maksim Baginskii aýrýhanada kóz jumdy. Bul týraly Qazaqstannyń Syrtqy ister ministrligi málimdedi, dep habarlaidy dalanews.kz.
Órt 15 tamyzda bolǵan. Oqiǵa saldarynan barlyǵy 11 adam zardap shekken. Denesiniń 70 paiyzyn kúiik shalǵan Maksim Baginskii 18 tamyzda qaitys bolǵan.
"Qazaqstan Respýblikasynyń Syrtqy ister ministrligi Omby qalasyndaǵy órt saldarynan qaza tapqan Qazaqstan azamaty Maksim Baginskiidiń týǵan-týystary men jaqyndaryna qaiǵyryp kóńil aitady", - delingen vedomstvo habarlamasynda.
Qazirgi ýaqytta Qazaqstannyń Omby qalasyndaǵy Bas konsýldyǵy marqumnyń otbasyna qajetti konsýldyq-quqyqtyq kómek kórsetip jatyr. Atap aitqanda, diplomattar qujattardy rásimdeýge jáne qaiǵyly oqiǵanyń mán-jaiyn anyqtaý úshin Reseidiń quzyrly organdarymen bailanys ornatýǵa kómektesýde.
Syrtqy ister ministrligi marqumnyń otbasymen turaqty bailanysta ekenin jáne óz quzyreti sheginde qajetti qoldaý kórsetip jatqanyn málimdedi.
Reseide órt deregi boiynsha eńbek qaýipsizdigi talaptarynyń buzylýyna qatysty qylmystyq is qozǵaldy.
