Qazaq KSR-niń eńbek sińirgen ártisi, belgili balet ártisi, horeograf jáne pedagog Edýard Málbekov dúnieden ótti, dep habarlaidy dalanews.kz.
QR Mádeniet jáne aqparat ministrligi marqumnyń týǵan-týystary men jaqyndaryna, áriptesteri men shákirtterine kóńil aitty.
Edýard Jabashuly sanaly ǵumyryn ónerge arnap, otandyq balet óneriniń qalyptasýy men damýyna eleýli úles qosty. Onyń esimi qazaq horeografiiasynyń tarihynda erekshe oryn alady.
Óner jolynda ol «Spartak», «Baqshasarai burqaǵy», «Jizel», «Aqqý kóli», «Don Kihot», «Mahabbat týraly ańyz», «Karmen-siýita» sekildi belgili qoiylymdarda basty partiialardy oryndady.
Sahnadaǵy qyzmetimen qatar Edýard Málbekov horeografiialyq bilim berý salasynda da uzaq jyl eńbek etti. Ol birneshe býyn ónerpazdy tárbielep, kóptegen shákirttiń kásibi qalyptasýyna yqpal etti.
Ministrlik málimetinshe, onyń shákirtteriniń birqatary búginde Qazaqstanda jáne shetelde otandyq balet ónerin tanytyp júr.
Edýard Málbekov kásibi sheberligimen, talapshyldyǵymen, ónerge adaldyǵymen jáne shákirtterine degen qamqorlyǵymen erekshelengen.
«Edýard Jabashulynyń jarqyn beinesi, ǵibratty ǵumyry men ulttyq mádenietke sińirgen eleýli eńbegi týǵan-týystarynyń, áriptesteri men shákirtteriniń, barsha ónersúier qaýymnyń jadynda máńgi saqtalady», – delingen ministrliktiń kóńil aitýynda.
