Шетелдік инвесторлар Қазақстанның теңгемен шығарылған мемлекеттік облигацияларына қызығушылық таныта бастады. Бір жылдың ішінде олардың осы бағалы қағаздарға салған қаржысы шамамен 2 млрд доллардан 5 млрд долларға жуықтаған. Инвестиция ағыны ұлттық валютаның нығаюына да ықпал етті, деп хабарлайды dalanews.kz.
Financial Times басылымының дерегінше, шетелдіктердің иелігіндегі қазақстандық мемлекеттік облигациялардың көлемі биыл маусымда нарықтың оннан бір бөлігіне жуықтаған. Инвесторларды Қазақстандағы жоғары мөлшерлеме мен салыстырмалы түрде тұрақты макроэкономикалық жағдай қызықтырып отыр.
Шетелдік капиталдың көптеп келуі теңге бағамына да қолдау көрсетті. 2026 жылдың басынан бері ұлттық валюта долларға шаққанда 9,7 пайызға нығайған. Осы көрсеткіш бойынша теңге Еуропа мен Азиядағы ең жақсы нәтиже көрсеткен валюталардың біріне айналды.
Қазақстандық облигацияларға сұраныстың артуына елдің борыштық нарығын халықаралық инвесторлар үшін қолжетімді ету жоспары да әсер еткен. Қазақстан мемлекеттік бағалы қағаздарды Euroclear халықаралық есеп айырысу жүйесіне қосуды көздеп отыр. Тікелей байланысты 2027 жылы іске қосу жоспарланған. Бұл шетелдік инвесторларға қазақстандық облигацияларды сатып алу мен олар бойынша есеп айырысуды жеңілдетпек.
Сонымен қатар Қазақстан өз облигацияларын дамушы елдердің мемлекеттік бағалы қағаздарын қамтитын JPMorgan GBI-EM индексіне енгізуге мүдделі. Мұндай қадам қазақстандық қарыз құралдарына халықаралық қорлардың назарын арттыруы мүмкін.
Елдегі ақша-кредит шарттары әлі де қатаң. Ұлттық банк мөлшерлемені екі рет төмендеткеннен кейін оның деңгейі 16,75 пайызды құрады. Ал инфляция шамамен 13 пайыздан 10 пайызға дейін баяулаған.
Financial Times сараптамасына сәйкес, жоғары кірістілік, инфляцияның төмендеуі және қаржы нарығының шетелдік инвесторларға біртіндеп ашылуы Қазақстанның мемлекеттік облигацияларын тартымды инвестициялық құралға айналдырып отыр.
